Россиянинг люкс-гаджетлар ишлаб чиқарувчиси Caviar компанияси мамлакат президенти Владимир Путиннинг таваллуд кунига бағишланган iPhone 17 Pro ва iPhone 17 Pro Max смартфонларининг махсус коллекциясини тақдим этди. Бу ҳақда «Код Дурова» нашри хабар берди.
Компания маълумотига кўра, «Россия коллекцияси» деб номланган серия авиация даражасидаги титан корпус ва Россия байроғи рангларидаги ювелир эмал ҳамда композит тош билан безатилган. Смартфонлар икки турда тақдим этилган:
Биринчи модел — «Бутун ҳаётим — Россия» деб номланади. Унинг орқа қисмида Путиннинг 2014 йил 24 октябрда Валдай мунозара клуби йиғилишида айтган «Мен учун Россия — бу бутун ҳаётим», деган сўзлари ёзилган. Давлат герби 999 пробали олтин билан қопланган, қора ониксдан ишланган элементлар билан безатилган.
Иккинчи модел — «Қудратли Россия». Бу версияда Россиянинг рамзий бургут белгиси ва байроқ тасвири бор. Унда ўйиб ёзилган иқтибос йўқ, бироқ қурилма президентнинг бошқа иборасини акс эттиради: «Агар уруш муқаррар бўлса, биринчи бўлиб зарба бериш керак».
Caviar’нинг маълум қилишича, телефон қутиси очилганда Владимир Путиннинг энг машҳур тўққизта иқтибоси янграйди. Смартфон нархлари 599 минг рублдан бошланади.