АҚШ президенти Доналд Трамп саккизинчи марта омма олдида РФ президенти Владимир Путиндан ранжиганини айтди. У Канада бош вазири Марк Карни билан учрашувда Россиянинг Украинага қарши уруши ҳақида сўз юритар экан, бу можарони ҳал этиш Яқин Шарқдаги тинчлик жараёнидан ҳам қийин бўлиши мумкинлигини таъкидлади.
«Бу — ақлбовар қилмас даражадаги вазият. Мен буни енгил ҳал бўлади, деб ўйлагандим. Путин билан муносабатларимиз яхши эди, шундай экан, буни осонликча ҳал этамиз, деб ишонгандим. Аммо мен ундан жуда ранжидим — бу уруш Яқин Шарқдаги келишувдан ҳам мураккаб экан», — деди Трамп. Унинг сўзларига кўра, ўтган ҳафта Украинадаги жангларда 7812 киши ҳалок бўлган, уларнинг кўпчилиги ҳарбийлар.
Бу Трампнинг Путиндан ранжигани ҳақидаги саккизинчи баёноти. Биринчисини у 1 июл куни Кремл раҳбари билан телефон орқали суҳбатдан сўнг айтган эди. Кейинчалик 8, 15 ва 28 июл кунлари ҳам шунга ўхшаш фикр билдирган. 2 сентябрда у Путинни «жуда ранжиганини» яна таъкидлади, 25 сентябрда Эрдўған билан учрашувда Россия нефт маҳсулотлари импортини тўхтатишга чақирди. 30 сентябрда эса «мен Путиндан жуда ранжидим, у бу ишни тугатиши керак эди», деган эди.
Трамп аввал ҳам Путинни «тўрт йилдан бери бир ҳафтада тугаши керак бўлган урушни давом эттираётган», Россия иқтисодиётини эса «парчаланган» деб атаган. Унинг фикрича, Украина Россияни ҳарбий жиҳатдан енгиш қобилиятига эга.
Доналд Трамп президентликнинг иккинчи муддатида Россия–Украина урушига чек қўйишга фаол ҳаракат қилмоқда. У Кремлни янги санкциялар билан таҳдид қилган, тинчлик бўйича аниқ муддатлар белгилаган, аммо улар тугагач, санкциялар жорий этилмаган. Август ойида Аляскада Путин билан юзма-юз учрашган Трамп Россия томонини урушни тўхтатишга чақирган, аммо Москва бу таклифларни рад этган ва Украина инфратузилмасига ҳужумларни кучайтирган.