Ўзбекистонда 2025 йил 15 майдан амалга киритилган янги тартибга мувофиқ, камбағаллик хавфи таҳлили орқали «қизил», «сариқ» ва «яшил» тоифаларга ажратилган оилалар билан боғлиқ механизм йўлга қўйилди. Мазкур тартиб доирасида, «қизил» тоифага мансуб деб топилган оилаларнинг аъло баҳолар билан таҳсил олаётган қиз фарзандлари учун алоҳида рағбат шаклида стипендия белгиланди.
Қонунчиликка кўра, ушбу талабаларга базавий стипендиянинг икки баравари миқдорида махсус стипендия ажратилади. Бу чора билан давлат томонидан оғир ижтимоий аҳволдаги оилалар фарзандларини қўллаб-қувватлаш, таълимга қизиқишни ошириш ва таълимда тенг имкониятлар яратиш мақсад қилинган.
Стипендия олиш ҳуқуқига эга бўлиш учун талаба қиз «аъло» баҳоларга ўқиши ва «қизил» тоифадаги оилага мансублиги расмий реестрда қайд этилган бўлиши лозим. Ҳужжатларни расмийлаштириш ва маблағ ажратиш масалалари маҳаллий ҳокимият ва таълим муассасалари томонидан назорат қилинади.
Мазкур чора Ўзбекистонда камбағалликни қисқартириш, аёлларнинг таълимга кириш имкониятини яхшилаш ва ижтимоий адолатни таъминлашга қаратилган кенг кўламли ислоҳотларнинг бир қисми ҳисобланади. Шунингдек, мазкур амалий қадам ота-оналарнинг қиз фарзандларини ўқишга рағбатлантиришида ҳам муҳим аҳамият касб этади.