Ўзбекистон Республикасининг Монако князлигидаги биринчи фавқулодда ва мухтор элчиси этиб Нодир Ғаниев тайинланди. Элчининг қароргоҳи Париж шаҳрида жойлашган бўлиб, у бир вақтнинг ўзида Ўзбекистоннинг Франция ҳамда Португалиядаги элчиси сифатида фаолият юритади. Бу ҳақда «Дунё» ахборот агентлиги хабар берди.
Нодир Ғаниев Монако князи Альберт II га ишонч ёрлиқларини топширди. Суҳбат давомида княз Ўзбекистон билан қайта тикланадиган энергия соҳасида йирик лойиҳаларни амалга оширишга қизиқиш билдирди. Шунингдек, у Самарқанд шаҳрида бу йил октябр–ноябр ойларида бўлиб ўтадиган ЮНЕСКО Бош конференциясининг 43-сессияси муносабати билан табрик сўзларини изҳор этди.
Ўзбекистон элчиси ўз навбатида, икки давлат ўртасидаги ҳамкорликни янада мустаҳкамлаш, инвестиция ва туризм соҳаларида алоқаларни кенгайтириш учун барча саъй-ҳаракатларни амалга оширишини таъкидлади.
Маълумот учун, Ўзбекистон ва Монако ўртасида дипломатик муносабатлар 2013 йил 29 ноябрда ўрнатилган. Ватикандан кейин дунёдаги иккинчи энг кичик давлат бўлган Монако Франциянинг Ривера соҳилида, Жер денгизи бўйида жойлашган.
Нодир Ғаниев 2024 йил сентябрда Франция президенти Эммануэл Макронга ишонч ёрлиқларини топширган, шу йил май ойидан эса Португалиядаги элчи вазифасини ҳам бажариб келмоқда.