Ижтимоий тармоқларда тарқалган видеоларда Тошкент шаҳридаги «Brasserie» кафесидаги мониторларда букмекерлик хизматларига оид белгили ахборот намойиш этилгани жамоатчилик муҳокамасига сабаб бўлди.
Маълумотларга кўра, бу ҳолат Ўзбекистон Республикасининг «Реклама тўғрисида»ги Қонунига зид ҳисобланади. Мазкур Қонунга кўра, қимор ва таваккалчиликка асосланган бошқа ўйинлар, шунингдек интернет ёки телекоммуникация тармоқлари орқали ташкил этиладиган ўйинлар рекламаси тақиқланган.
Шу асосда, реклама соҳасидаги назорат органи — Ахборот ва оммавий коммуникациялар агентлиги ҳузуридаги комиссия томонидан «One More» масъулияти чекланган жамияти, яъни «Brasserie» кафесига нисбатан қонунбузарлик аломатлари бўйича иш қўзғатилди.
Текширув натижасида мазкур ҳолатда «Реклама тўғрисида»ги Қонуннинг 46-моддаси талаблари бузилганлиги аниқланиши мумкин. Қонунбузарлик ҳолати тасдиқланса, ташкилотга нисбатан маъмурий чоралар кўрилиши кутилмоқда.
Қўмита ишни кўриб чиқиш якунлари бўйича қўшимча маълумот тақдим этилишини маълум қилди. Ҳозирча кафеда намойиш этилган реклама мазмуни ва уни жойлаштириш ташаббускори ҳақида расмий маълумот берилмаган.