«Ўзавтосаноат» маълумотларига кўра, жорий йилнинг тўққиз ойида мамлакат бўйлаб жами 296 минг 331 та автомобиль сотилган. Рақамлар Ўзбекистон авто бозоридаги кучлар нисбатини яна бир бор аниқ кўрсатди: UzAuto Motors компанияси ҳануз етакчи.
UzAuto Motors 141 минг 304 та автомобил сотган — бу умумий бозорнинг 47,7 фоизи демакдир. Унинг шуъба компанияси Khorezm Auto эса 103 минг 837 та ёки 35 фоиз улуш билан иккинчи ўринни эгаллади. Шу тариқа, UzAuto гуруҳининг умумий бозордаги улуши 82,7 фоизга етди.
Учинчи ўринда — ADM Jizzakh, у 32 минг 987 та автомобил сотиб, бозорнинг 11,1 фоизини эгаллади. Қолганлар орасида BYD Uzbekistan Factory 16 минг 846 та (5,7 фоиз), Asaka Motors — 937 та (0,3 фоиз), SamAuto — 341 та (0,13 фоиз) ва Alyans Auto — 79 та (0,03 фоиз) автомобил сотишга муваффақ бўлган.
Брендлар кесимида мутлақ етакчи — Chevrolet. Ушбу маркадан 245 минг 141 та авто сотилган. Кейинги ўринларда KIA (18 минг 863 та), BYD (16 минг 846), Chery (8 минг 90), Haval (6 минг 34), Hyundai (758), Isuzu D-Max (341) ва Wuling (105) келади.
Энг кўп сотилган моделлар орасида анъанавий равишда Chevrolet Cobalt (95 минг 362 та), Damas (78 минг 712) ва Tracker (27 минг 921) етакчи бўлди. Шунингдек, ўнталикка Labo (25 минг 129), Onix (16 минг 287), KIA Sonet (13 минг 633), BYD Song Plus Champion DMI (4 минг 933), Yuan Up (4271), Chazor (3520) ва Haval M6 (3204) кирди.
Аввалроқ 2025 йилнинг январ–август ойларида Cobalt автомобили энг кўп ишлаб чиқарилган бўлса-да, кўрсаткич ўтган йилга нисбатан 2,98 фоизга камайгани ҳақида хабар берган эдик.