2025 йилги Нобел Тинчлик мукофоти соҳибаси, Венесуэла мухолифат ҳаракати етакчиси Мария Корина Мачадо мукофотни «қийналаётган ватандошларига ва президент Доналд Трампга» бағишлади. Бу ҳақда у 10 октябр куни X ижтимоий тармоғи орқали маълум қилди.
«Мен бу мукофотни азоб чекаётган Венесуэла халқи ва бизнинг ишларимизга қатъий ёрдам берган президент Трампга бағишлайман», — деб ёзди сиёсатчи.
Мачадо таъкидлашича, бу мукофот нафақат унинг шахсий ютуғи, балки бутун Венесуэла халқининг иродаси ва эркинлик учун курашининг эътирофи ҳисобланади. Унинг сўзларига кўра, мамлакат «ғалаба остонасида турибди» ва бу жараёнда АҚШ, Трамп, Лотин Америкаси халқлари ҳамда демократик давлатлар «озодлик ва демократияни қўллаб-қувватловчи асосий иттифоқдошлар» бўлиб хизмат қилмоқда.
Нобел қўмитаси билан суҳбатида Мачадо мукофотни олишни «кутилмаган ҳолат» деб атади. «Ҳанузгача ишона олмаяпман… Мен катта ҳаракатнинг кичик бир қисми, фақат ўз халқим билан бирга бўлганимдан фахрланаман», — деди у Нобел қўмитаси эълон қилган аудиомурожаатида.
Мария Корина Мачадо сўнгги йилларда Венесуэлада демократик ислоҳотлар учун олиб бораётган кураши билан танилган. Унинг ҳаракати авторитар тузумга қарши тинч йўл билан курашиш стратегияси ва халқаро ҳамкорлик орқали сиёсий ўзгаришларга эришишни мақсад қилган.