Франция президенти Эммануэл Макрон жума куни кечқурун Елисей саройида қабул қилган қарор билан Себастен Лекорнюни яна мамлакат бош вазири этиб тайинлади. Бу ҳақда президент маъмурияти расмий веб-сайти орқали маълум қилинди. Янги тайинловдан сўнг Лекорнюга ҳукуматни қайта шакллантириш вазифаси юклатилди.
39 ёшли Себастен Лекорню аввалроқ, 6 октябр куни, 2026 йилги давлат бюджети бўйича келишувга эришилмагани сабабли истеъфо берган эди. У янги лавозимга тайинланганидан кейин X ижтимоий тармоғида: «Мен республика президенти ишончини қабул қиламан. Франция бюджетини йил охиригача қабул қилиши ва фуқароларнинг муаммоларига ечим топилиши учун бор кучимни ишга соламан», — дея баёнот берди.
Лекорню ўз чиқишида француз жамиятида юзага келган сиёсий инқирозни тугатиш зарурлигини таъкидлади. «Биз французларни ғазаблантираётган сиёсий беқарорликка чек қўйишимиз керак. Бу ҳолат мамлакат обрўси ва манфаатларига салбий таъсир кўрсатмоқда», — деди у.
Себастен Лекорню Франциянинг собиқ мудофаа вазири бўлиб, Макроннинг яқин сиёсий иттифоқчиларидан бири ҳисобланади. У илк бор 9 сентябрда бош вазир лавозимига тайинланган эди. Шу билан Макрон сўнгги икки йил ичида бешинчи марта ҳукумат раҳбарини алмаштирди.
Франциядаги сиёсий беқарорлик фонида халқаро рейтинг агентликлар ҳам мамлакат иқтисодий ҳолатидан хавотир билдирмоқда. Fitch агентлиги 12 сентябр куни Франциянинг кредит рейтингини АА-дан А+ даражасига туширди. Бу мамлакат тарихидаги энг паст баҳолардан бири бўлиб, Франция қарзи ЯИМнинг 115 фоизига етган. Европа Иттифоқида бу кўрсаткич бўйича фақат Греция ва Италия олдинда турибди.