АҚШ президенти Дональд Трамп ўзининг Truth Social ижтимоий тармоғида 2025 йил 1 ноябрдан бошлаб Хитойдан келаётган товарларга қўшимча 100 фоизли бож жорий этилишини маълум қилди. Унинг таъкидлашича, бу чора Хитой ҳукумати томонидан деярли барча ишлаб чиқарилган маҳсулотлар экспортига нисбатан чекловлар киритилишига жавобдир.
Трампнинг айтишича, янги тарифлар Хитой томонидан амалга ошириладиган кейинги ҳаракатларга қараб эртароқ ҳам кучга кириши мумкин. Шу билан бирга, АҚШ 1 ноябрдан бошлаб муҳим дастурий таъминот турларига нисбатан экспорт назоратини кучайтиради.
АҚШ президенти Хитойнинг бу ҳаракатларини халқаро савдода «адолатсиз ва камситувчи» деб атади. Унинг сўзларига кўра, Пекин экспортига киритилган чекловлар бошқа давлатлар билан иқтисодий муносабатларга салбий таъсир кўрсатиши мумкин.
BBC News маълумотича, Хитой дунёда нодир ер металларини қазиб олиш ва қайта ишлаш бўйича етакчи ҳисобланади. Бу элементлар автомобилсозлик, смартфон ва электрон қурилмалар ишлаб чиқаришда муҳим аҳамиятга эга. 9 октябр куни Хитой Тижорат вазирлиги мазкур металлар экспортига янги рухсатнома талабларини жорий қилганини маълум қилган эди.
Шу билан бирга, Пекин АҚШнинг Qualcomm технологик компаниясига нисбатан монополияга қарши тергов бошлади ҳамда Америка кемалари учун янги порт тўловларини жорий этди.
Трамп Жанубий Кореяда бўлиб ўтиши кутилган ОТИҲТ саммитида Си Цзинпин билан учрашув истиқболига ҳам шубҳа билан муносабат билдирди. Шу билан бирга, кейинчалик у бу учрашувнинг бекор қилинмаслигини таъкидлади.
Мутахассислар фикрича, янги божлар АҚШ ва Хитой ўртасидаги савдо урушининг янги босқичини бошлаб бериши мумкин. Хитой томони эса АҚШнинг жавоб чораларидан қўрқмаслигини билдириб, ўзининг иқтисодий барқарорлигига ишонмоқда.