Syria TV телеканали манбаларига таяниб хабар беришича, Сурия демократик кучлари (SDF) Дайр-уз-Завр вилоятидаги нефт конларини Дамашқ ҳукумати ихтиёрига топширишга розилик билдирган. Бу келишув Сурия шимолий-шарқий ҳудудларини марказий ҳокимият билан бирлаштириш жараёнининг илк босқичи бўлади.
Манба маълумотига кўра, Дайр-уз-Завр нефт конлари бўйича келишув ўтган ҳафта Дамашқда бўлиб ўтган Сурия президенти Аҳмад аш-Шаръа ва РКК/YPG ташкилотининг суриялик етакчиси Мазлум Абди ўртасидаги учрашувда эришилган.
Дастлабки келишувга мувофиқ, интеграция жараёни Дайр-аз-Завр вилоятидан бошланади ва у нафақат нефт саноати объектларини, балки фуқаролик идоралари, ҳарбий ва ҳуқуқни муҳофаза қилиш тизимларини ҳам қамраб олади. Манбалар келишув ҳозирча оғзаки тарзда амалга оширилганини таъкидлаган.
Сўнгги кунларда Дамашқда дипломатик фаоллик кучайгани кузатилмоқда. Хусусан, президент Аҳмад аш-Шаръанинг АҚШ делегацияси билан учрашуви бўлиб ўтган. Делегация таркибида АҚШнинг махсус элчиси Том Барак ва Марказий қўмондонлик раҳбари адмирал Брэд Купер ҳам бор эди. Учрашувда ташқи ишлар ва мудофаа вазирлари ҳамда бош разведка бошлиғи иштирок этган.
Кузатувчилар фикрича, Дайр-уз-Завр нефт конларининг Дамашқга ўтиши Суриядаги иқтисодий ва сиёсий барқарорликни тиклашда ҳал қилувчи қадам бўлиши мумкин. Аммо келишув амалий босқичга ўтишидан олдин ҳали бир қатор мураккаб келишувлар кутилмоқда.