Ўзбекистон Республикаси биринчи мудофаа вазири Рустам Аҳмедов 82 ёшида оламдан ўтди. У мустақилликдан кейинги илк йилларда мамлакат мудофаа тизимини нолдан қуришга бошчилик қилган ҳарбий арбоб сифатида тарихда қолган.
1992-йилда Президент Ислом Каримов фармони билан Аҳмедов Ўзбекистон Республикаси Мудофаа вазири этиб тайинланган. Унинг зиммасига Совет Иттифоқидан қолган ҳарбий қисмлар ва техника иншоотларини республика тасарруфига ўтказиш, миллий армия тизимини шакллантириш вазифаси юклатилган эди.
Аҳмедов раҳбарлиги даврида Мудофаа вазирлиги тизими яратилди, ҳарбий қисмлар ва ўқув марказлари ташкил этилди, генерал штаб тузилмаси шаклланди. Шунингдек, миллий кадрлар тайёрлаш сиёсати амалга оширилиб, ҳарбий академия ва лицейлар фаолияти йўлга қўйилди.
1992 йилнинг 14 январида Ўзбекистон Совет армиясидан қолган бўлинмалар устидан тўлиқ назоратни қўлга киритди. Бу сана кейинчалик “Ватан ҳимоячилари куни” сифатида эълон қилинди ва ҳозир ҳам мамлакат миқёсида нишонланиб келинмоқда.
1994-йилда Рустам Аҳмедов лавозимидан озод этилган бўлса-да, унинг миллий армияни барпо этишдаги ҳиссаси тарихда алоҳида ўрин тутади. У Ўзбекистон Қуролли Кучларининг пойдеворини қўйган авлоднинг ёрқин вакили сифатида эсланади.