Швеция Фанлар академияси 2025 йил 14 октябр куни иқтисод бўйича Нобел лауреатларини эълон қилди. Бу йилги мукофот «инновацион иқтисодий ўсишни тушунтириб бергани учун» Жоэл Мокир, Филипп Агион ва Питер Ҳауитга берилди.
Жоэл Мокир иқтисодий тарихда технологиянинг ролини ўрганиб, инновациянинг ижтимоий ва институционал омилларини аниқлаган.
Филипп Агион ва Питер Ҳауит эса «ижодий вайрона қилиш» назариясини ривожлантириб, иқтисодий ўсишни доимий янгиланиш жараёни сифатида изоҳлагани учун тақдирланди.
Tаъкидлашича, уларнинг ишлари иқтисодий ўсишнинг фақат капитал ёки ресурсларга эмас, балки илм-фан, технология ва янгилик яратиш қобилиятига асосланишини илмий жиҳатдан исботлаб берди.
Сўнгги беш йиллик хронология
Сўнгги беш йил ичида иқтисодиёт бўйича Нобел мукофотлари фаннинг турли йўналишларини қамраб олди.
2020 йилда мукофот Пол Милгром ва Роберт Уилсонга берилган. Улар аукцион назариясини янгилаб, бозор механизмларининг самарадорлигини ошириш бўйича муҳим назарий асос яратди. Ушбу моделлар энергия квоталари, давлат ресурслари ва интернет диапазонларини тақсимлашда қўлланиладиган замонавий аукцион тизимларига пойдевор бўлди.
2021 йилда мукофот Дэвид Кард, Жошуа Ангрист ва Гуидо Имбенсга берилди. Улар эмпирик иқтисодиёт ва сабаб-оқибат («causal inference») таҳлил усулларини такомиллаштиргани учун тақдирланди. Кард меҳнат бозорида миграция, таълим ва минимал иш ҳақи каби омилларни тажриба асосида ўрганиб, иқтисодий сиёсатнинг амалий таъсирини кўрсатди.
2022 йилда мукофот Бен Бернанке, Дуглас Даймонд ва Филип Дайбвигга берилди. Улар банк тизимининг барқарорлик механизмларини, молиявий инқирозларнинг сабаб ва оқибатларини чуқур таҳлил қилган. Бернанке Буюк депрессия давридаги банк инқирозларини эмпирик жиҳатдан ўрганган, Даймонд ва Дайбвиг эса назарий модел орқали банклар фаолиятидаги хавфларни изоҳлаб берган.
2023 йилда тарихда илк бор иқтисодиёт бўйича Нобел мукофоти аёл иқтисодчи — Клаудия Голдинга берилди. У аёлларнинг меҳнат бозоридаги иштироки ва даромад тенгсизлигининг тарихий сабабларини тадқиқ этди. Голдин ўз ишларида таълим, оила сиёсати ва бозор талабининг ўзгариши аёллар имкониятларига қандай таъсирини кўрсатди.
2024 йилда мукофот Дарон Асемоғлу, Саймон Жонсон ва Жеймс Робинсонга насиб этди. Улар институционал иқтисодиёт бўйича тадқиқотлари билан тан олинди. Уларнинг ишлари сиёсий институтлар, қонун устуворлиги ва мулк ҳуқуқининг иқтисодий ўсишдаги ҳал қилувчи ролини исботлади. Шу тариқа, фаровонлик ва ривожланиш фақат ресурслар эмас, балки мустаҳкам институтлар ва адолатли сиёсий тизимларга ҳам боғлиқ экани кўрсатилди.
2020–2025 йиллар оралиғида иқтисодиёт бўйича Нобел мукофоти фан тараққиётининг янги йўналишини белгилаб берди. Бу йиллардаги тадқиқотлар иқтисодий ўсишни фақат рақамлар ва моделлар билан эмас, балки инсон капитали, институтлар ва технология билан боғлиқ жараён сифатида талқин этди.
2025 йилги мукофот эса бу жараённинг мантиқий давоми бўлиб, иқтисодий барқарорликнинг асосида инновация, илм-фан ва ижодий янгиланиш жараёни туришини илмий жиҳатдан исботлаб берди.
Аввалроқ, Нобел мукофотининг физика, кимё ва адабиёт йўналишлари бўйича совриндорлари ҳақида хабар берган эдик.