Беларус президенти Александр Лукашенко Украина Россия билан музокараларни зудлик билан бошламаса, давлат сифатида мавжуд бўлишни тўхтатиши мумкинлигини айтди.
«Россия фронтда олға бормоқда. Мен буни ҳар куни кўриб турибман. Агар ишлар шу суръатда давом этса, Украина давлат сифатида йўқ бўлиб кетиши мумкин», – дея таъкидлади Беларус раҳбари.
У Украина президенти Владимир Зеленскийга «ўтириб, музокаралар олиб боришни» маслаҳат берди ва Киевнинг ғарбий қўшнилари гўёки «унинг ҳудудининг бир қисмини тортиб олишга қарши эмаслигини» қўшимча қилди.
Лукашенконинг баёноти Россиянинг Украина энергетика инфратузилмасига янги зарбалари бир пайтда янгради. Кеча тунда Россия Киев, Донецк, Одесса ва Чернигов вилоятларидаги энергетика тармоқларига ҳужум қилди. Киев вилояти губернатори Николай Калашникнинг маълум қилишича, DTEK компаниясининг икки ходими подстанциянинг ўққа тутилиши оқибатида яраланган.
Украина президенти Владимир Зеленский Москва «ҳаво террорини давом эттираётгани»ни ва сўнгги бир ҳафта ичида мамлакат бўйлаб «3100 дан ортиқ дрон, 92 та ракета ва 1360 га яқин глиде бомба» учирганини айтди. У «ушбу урушни молиялаштираётган» рус нефтини харидорларга нисбатан қўшимча санкциялар жорий этишга чақирди.
Зеленский АҚШ президенти Доналд Трамп билан телефон орқали суҳбати ҳақида ҳам гапирди. Раҳбарлар Украина ҳаво ҳужумидан мудофаа тизимини мустаҳкамлаш ва узоқ масофага учувчи «Томагавк» ракеталарини етказиб бериш имкониятларини муҳокама қилди. «Биз бу борада ишлаяпмиз ва президент қарорини кутмоқдамиз», деди Зеленский Fox News телеканалида.