АҚШ Украинага қурол етказиш бўйича янги қарор ҳақида муҳим эълон қилишга тайёрланмоқда. Бу ҳақда НАТОдаги Америка доимий вакили Мэттю Уитакер матбуот анжуманида маълум қилди. Унинг сўзларига кўра, баёнот 15 октябр куни берилади ва у Киев учун янги ҳарбий ёрдам пакетини ўз ичига олади.
«Президент Трамп Украинага дунёдаги энг яхши қуролларни берди. Бу украинларга жуда зарур, улар интизорлик билан кутишмоқда. Бу дастур Россияни музокаралар столига ўтқазиш учун ҳаётий аҳамиятга эга», — деди Уитакер.
НАТО вакили жанубий Европа мамлакатларини Украинага кўпроқ ёрдам кўрсатишга чақирди. Унинг таъкидлашича, айниқса PURL дастури доирасида Европа маблағлари ҳисобига АҚШ қуролларини сотиб олиш муҳим аҳамият касб этади.
Аввалроқ АҚШ президенти Доналд Трамп Украинага Tomahawk қанотли ракеталарини бериш ҳақида «деярли қарор қабул қилиб бўлинганини» айтган эди. Унинг таъкидлашича, агар Россия урушни тўхтатмаса, Вашингтон Киевга ушбу ракеталарни етказиб беришни бошлаши мумкин.
Ҳозирча Вашингтон расмий равишда қайси турдаги қуроллар ҳақида гап кетаётганини очиқламаган. Бироқ таҳлилчиларнинг фикрича, агар гап Tomahawk ҳақида бўлса, бу Украина ҳарбий салоҳиятини янги босқичга олиб чиқиши мумкин.
Яқин соатларда Пентагон ва Оқ уй қўшимча маълумот беришини кутмоқда.