Тошкентда қуриладиган янги халқаро аэропортни Саудия Арабистонининг Vision Invest ва Япониянинг Sojitz Corporation компаниялари барпо этади. Бу ҳақда Nikkei Asia нашри хабар берди. Лойиҳа давлат-хусусий шериклик (PPP) асосида амалга оширилади.
Маълумотларга кўра, Sojitz компанияси лойиҳага «миллиардлаб иена» инвестиция йўналтиради, бу тахминан 200 млн атрофидаги маблағни ташкил этади. Янги аэропортнинг очилиши 2028 йилга режалаштирилган.
Ўзбекистон Президенти Шавкат Мирзиёев 15 октябр куни Саудия Арабистонининг етакчи компаниялари ва бизнес доиралари вакиллари билан учрашув ўтказди.
Учрашувда янги аэропорт қурилишига тамал тоши қўйиш маросими бўлиб ўтишини маълум қилинди.
Учрашувда Подшоҳликнинг инвестициялар вазири Холид ал-Фалиҳ, шунингдек, ACWA Power, Al Muhaidib Group, Vision Invest, Data Volt, Riyadh Cables, AlMajdiah, Saudi Tabreed, Miahona каби йирик компаниялар раҳбарлари иштирок этди.
Президентнинг таъкидлашича, бу лойиҳа икки давлат ўртасидаги яқин ҳамкорликнинг амалий ифодаси бўлади.
Sojitz Corporation президенти Косуке Уэмура август ойида компаниянинг Ўзбекистондаги умумий инвестиция портфели 1 млрд долларга етганини маълум қилган эди. Шундан 200 млн айнан Тошкент халқаро аэропорти қурилишига йўналтирилади. Nikkei Asia’нинг қайд этишича, Sojitz Япониядаги Кумамото ва Окинава аэропортларини, шунингдек Палаудаги аэропортни ҳам бошқаради.
Ўзбекистон Республикаси Президентининг 1 августдаги қарорига кўра, янги аэропорт йиллик 20 млн йўловчини қабул қилиш имкониятига эга бўлади. У бир вақтнинг ўзида 169 та самолётни жойлаштириш, соатига 40 та парвоз ва қўнишни таъминлаш қувватига эга бўлади.
Uzbekistan Airports раҳбари Жавлонбек Умарходжаевнинг сўзларига кўра, янги аэропорт тўлиқ рақамлаштирилади ва замонавий технологиялар асосида қурилади.
Транспорт вазири Илҳом Маҳкамовнинг маълум қилишича, аэропорт пойтахтдан 17 км жанубда, М-39 автомагистрали яқинида жойлашади. Бу ҳудуд логистика ва транспорт инфратузилмаси нуқтаи назаридан қулай ҳисобланади.
Тошкент вилояти ҳокими Зойир Мирзаев эса лойиҳа Ўрта Чирчиқ туманидаги 1200 гектар майдонда амалга оширилишини билдирган. Иқтисодиёт ва молия вазирлиги маълумотича, 2026 йилда Тошкент, Бухоро ва Урганчда янги халқаро аэропортлар қурилиши бошланади.
Тошкент аэропорти учун жами 1310 гектар ер ажратилади — шундан 790,7 гектар Ўрта Чирчиқ, 519 гектар эса Қуйи Чирчиқ тумани ҳиссасига тўғри келади.