Португалиялик ҳужумчи Криштиану Роналду ва аргентиналик Лионел Месси миллий терма жамоалар ўйинларида жаҳон рекордларини ўрнатишди. БУ ҳақда РБК хабар берди.
Роналду Венгрияга қарши ўйинда (2:2) иккита гол уриб, жаҳон чемпионати саралаш босқичидаги голлар сони бўйича рекордни (41) янгилади. У бу рекордни 50-ўйинида ўрнатди. Роналду гватемалалик Карлос Руиснинг натижасини (47 ўйинда 39 гол) ортда қолдирди. Рўйхатда учинчи ўринда Месси (72 ўйинда 36 гол) турибди.
Роналду миллий терма жамоалар ўртасидаги ўйинларда энг кўп гол урган футболчи ҳисобланади – 143 та. У Мессидан 29 та гол билан олдинда. Шу билан бирга, Роналду жаҳон чемпионатларидаги голлари сони бўйича кучли йигирматаликка кирмайди – 8 та гол. Месси эса 13 та гол билан тўртинчи ўринда турибди.
Аргентина терма жамоаси ўртоқлик учрашувида Пуэрто-Рико жамоасини 6:0 ҳисобида мағлуб этди. Месси иккита голли узатма берди ва миллий жамоалар даражасида ассистлар сони бўйича янги рекорд ўрнатди.
38 ёшли ҳужумчи энди терма жамоа учун ўтказган ўйинларида 60 та самарали узатмага эришди. Месси 58 тадан узатма берган америкалик Лендон Донован ва бразилиялик Неймардан ўзиб кетди.
40 ёшли Роналду беш марта «Олтин тўп» соҳиби, беш карра Чемпионлар лигаси ғолиби, шунингдек, расмий ўйинларда жаҳон футболи тарихидаги энг самарали тўпурар ҳисобланади.
Месси «Олтин тўп»лар сони бўйича (саккизта) рекордчи саналади. Бундан ташқари, у олти марта «Олтин бутса» совриндори, Испания чемпионати, «Барселона» ва Аргентина терма жамоаси тарихидаги энг зўр тўпурар унвонига эга. У Аргентина терма жамоаси билан бирга иккита Америка кубогини (2021, 2024) ва 2022 йилги жаҳон чемпионатини қўлга киритган.