Forbes нашри жаҳондаги энг юқори маош олувчи футболчилар рўйхатини тақдим этди. Рейтингда нафақат майдондаги маош ва бонуслар, балки реклама шартномалари, бренд ҳамкорликлари ва турли тадбирлардан келган даромадлар ҳам ҳисобга олинган.
2025 йилда футболчиларнинг умумий йиллик даромади 945 млн долларни ташкил этди, бу кўрсаткич ўтган йилга нисбатан 4 фоизга камайган.
Рейтингда биринчи ўринни Саудия Арабистонининг «Ан-Наср» клубида ўйнаётган португалиялик суперюлдуз Криштиану Роналду эгаллади — унинг йиллик даромади 280 млн доллар, шундан 230 млнини майдонда, 50 млн долларни майдондан ташқари фаолиятлардан топган.
Топ-10 футболчи қуйидагича:
- Криштиану Роналду («Ан-Наср») — 280 млн доллар (230+50)
- Лионел Месси («Интер Майами») — 130 млн (60+70)
- Карим Бензема («Ал-Иттиҳод») — 104 млн (100+4)
- Килиан Мбаппе («Реал Мадрид») — 95 млн (70+25)
- Эрлинг Ҳоланд («Манчестер Сити») — 80 млн (60+20)
- Винисиус Жуниор («Реал Мадрид») — 60 млн (40+20)
- Муҳаммад Салоҳ («Ливерпуль») — 55 млн (35+20)
- Садио Мане («Ан-Наср») — 54 млн (50+4)
- Жуд Беллингҳэм («Реал Мадрид») — 44 млн (29+15)
- 10. Ламин Ямал («Барселона») — 43 млн (33+10).
Forbes шунингдек, Роналдуни бутун спорт дунёсидаги энг кўп маош оладиган спортчи сифатида ҳам тан олди. 2024 йил 1 майидан 2025 йил 1 майигача у 275 млн доллар ишлаган.
Bloomberg маълумотларига кўра, Роналдунинг умумий бойлиги 1,4 млрд долларга етган — бу тарихдаги илк футболчи сифатида миллиарддан ортиқ бойликка эга бўлган ҳолат ҳисобланади.