Президент Шавкат Мирзиёевнинг 15 октябрдаги қарори билан Сув хўжалиги вазири Шавкат Хамраевга икки янги ўринбосар тайинланди.
Зокир Эшкурбонович Ишпулатов сув хўжалиги вазирининг биринчи ўринбосари — Сув хўжалиги объектларини эксплуатация қилиш агентлиги директори лавозимига тайинланди. У 2023 йилдан буён вазир ўринбосари сифатида ишлаб келаётган эди.
Ишпулатов 1983 йил 24 июнда Сурхондарё вилояти Термиз туманида туғилган. 2005 йилда Тошкент ирригация ва мелиорация институтини бакалавр даражасида, 2009 йилда эса магистратура даражасида тамомлаган. У сув хўжалиги тизимидаги бир қатор ташкилотларда раҳбарлик лавозимларида фаолият юритиб, соҳада катта амалий тажриба тўплаган.
Шу билан бирга, Миролимжон Каримжон ўғли Каримов сув хўжалиги вазири ўринбосари этиб тайинланди. У бу лавозимгача Ҳисоб палатасида бош инспектор ва шуъба мудири сифатида ишлаган.
Каримов 1977 йил 3 январда Фарғона вилояти Бешариқ туманида туғилган. 2000 йилда Тошкент давлат иқтисодиёт университети бакалавриатини, 2002 йилда магистратурасини тамомлаган. У меҳнат фаолиятини 1993 йилда Бешариқ туманидаги «Навбаҳор» улгуржи савдо базасида экспедитор сифатида бошлаган, кейинчалик хусусий сектор, банк ва солиқ тизимларида фаолият юритган.