16 октябр куни Россия президенти Владимир Путин АҚШ раҳбари Доналд Трамп билан телефон орқали мулоқот чоғида Украина билан можарони тугатиш учун Донецк области устидан тўлиқ назоратни талаб қилди. Бу ҳақда суҳбатдан хабардор икки юқори мансабдор шахс The Washington Post нашрига маълум қилди.
Манбаларга кўра, Путиннинг бу баёноти унинг аввалги талабларидан сезиларли даражада чекинмаганини кўрсатади. У аввал ҳам шундай шартларни илгари сурган, аммо бу келишувга олиб келмаган. Президентнинг сўзларига кўра, Россия Донецк области эвазига Запорижжя ва Херсон областиларининг босиб олинмаган ҳудудларига бўлган даъволаридан воз кечишга тайёр.
Шу билан бирга, Луҳанск области қайриб тўлиқ Россия армияси назоратида. Нашр таъкидлашича, Путиннинг бу галги талаблари август ойида Аляскада Трамп билан бўлиб ўтган учрашувда айтилганларидан бир оз юмшоқроқ. Оқ уйдаги баъзи мансабдорлар буни «илгарилаш аломати» сифатида баҳоламоқда.
Бироқ Украина ҳукумати бу таклифни қабул қилиши эҳтимоли жуда кам. Европалик дипломатлардан бири бу ҳақда шундай деди: «Бу уларнинг ўз мустақиллигини арзон гаровга сотишига ўхшайди».
The Washington Post ёзишича, 17 октябр куни Трампнинг махсус вакили Стивен Уиткофф Вашингтонда Украина президенти Владимир Зеленский бошчилигидаги делегация билан учрашиб, Донецк областини Россия назоратига ўтказиш бўйича келишувга кўндиришга уринган. Унинг сўзларига кўра, бу ҳудудда асосан русийзабон аҳоли яшайди. Оқ уй ҳам, Кремл ҳам бу маълумотга изоҳ бермади.
Эслатиб ўтамиз, Путин 2024 йил июнида ҳам шундай шартларни баён этган — Украина қўшинлари Луҳанск, Донецк, Херсон ва Запорижжя ҳудудларидан тўлиқ чиқиб кетиши, шунингдек, НАТОга қўшилиш режаларидан воз кечиши кераклигини айтган. 2025 йил август ойида Россия раҳбари бу шартлар ҳануз кучда эканини тасдиқлаган эди.