Gizmochina нашрининг ёзишича, iPhone 17 Pro ва Pro Max моделларини харид қилган айрим фойдаланувчилар қурилмаларининг ранги қисман ўзгариб, аслидаги тусдан фарқ қила бошлаганини маълум қилган. Улар бу ҳолатни Reddit ва Facebook ижтимоий тармоқлардаги суратлар билан исботлаган.
Фотосуратларда айниқса «Cosmic Orange» моделидаги алюминий корпус қисмларининг пушти ёки олтин тусга айланиши яққол кўзга ташланади. Шу билан бирга, марказдаги матли шиша панел ўз ҳолича сақланиб қолган. Муаммо фақат битта рангда эмас — «Deep Blue» моделида ҳам камера атрофидаги қисмда шундай ҳолат аниқланган.
Айрим фойдаланувчилар буни ултрабинафша нурлари таъсири билан изоҳламоқда, аммо бу тахмин ҳали илмий жиҳатдан тасдиқланмаган. Ҳодиса Reddit, TikTok ва бошқа платформаларда кенг муҳокамага сабаб бўлди, бу эса муаммонинг кўламли эканини кўрсатмоқда.
Муттахассислар Apple’нинг расмий қўллаб-қувватлаш хизматига мурожаат қилишни тавсия этмоқда. Чунки қурилмалар ҳали кафолат муддати ичида бўлгани сабабли, компания таъмирлаш ёки янгисига алмаштириш чорасини кўриши мумкин.
Эслатиб ўтиш жоиз, iPhone 17 Pro моделлари жорий йилда бир қатор янгиланган дизайн билан тақдим этилган: янги камера тизими, икки қисмли орқа панел ва титандан алюминийга ўтиш шулар жумласидандир. Шунингдек, бу сафар Apple Pro серияси учун илк бор тўқ рангсиз вариантларни таклиф этган эди.
Apple ҳозирча мазкур ҳолат юзасидан расмий баёнот бермаган, аммо фойдаланувчилар компаниядан яқин вақт ичида аниқ изоҳ ва амалий ечим кутишмоқда.