Вашингтонда АҚШ президенти Доналд Трамп билан учрашувдан сўнг Украина раҳбари Володимир Зеленский ўзининг Telegram канали орқали баёнот берди. Унда Зеленский Россия президенти Владимир Путиннинг таклифларини рад этиб, Украина ҳеч қачон урушни бошламаганини ва Россияга ҳеч нарсани бермаслигини таъкидлади.
«Украина ҳеч қачон урушга интилиб келмаган. Биз ҳеч бир шартларсиз оташкесимга рози бўлдик, тинчлик учун йўл изладик, аммо айнан Россия бу жараённи доим тўхтатиб келмоқда — музокараларни чўзмоқда, ҳаво ҳужумлари билан аҳолини қийнамоқда, фронтда ҳужумларини кучайтирмоқда. Уруш фақат Москва туфайли давом этмоқда», — деди Зеленский.
Унинг сўзларига кўра, Россия сўнгги ҳафтанинг ўзида Украинага қарши 3270 та дрон, 1370 та бошқариладиган авиабомба ва 50 га яқин ракета ишлатган. Шунинг учун Киев ҳаво ҳимоясини кучайтириш, Украина мудофаа саноатига сармоя киритиш ва халқаро шериклар билан ҳамкорликни кенгайтириш йўналишида фаол иш олиб бормоқда.
«Путинни гап билан тўхтатиб бўлмайди — босим керак. Дунё кўриб турибди: Россия фақат кучга жавоб беради. Демак, тинчлик фақат куч орқали таъминланиши мумкин. Украина террорчиларга ҳеч қандай мукофот бермайди. Биз ҳамкорларимиздан ана шундай қатъий позицияни кутаяпмиз», — дея қўшимча қилди Зеленский.
The Washington Post нашрининг ёзишича, 16 октябрдаги телефон мулоқоти пайтида Путин Доналд Трампдан Украина Донбассни Россияга беришга рози бўлишини талаб қилган.
Эвазига Москва Запорижжя ва Херсон областларининг оккупация қилинмаган қисмларини бўлган даъводан воз кечишга тайёрлигини билдирган. Манбаларнинг маълумотича, бу позицияни Оқ уйда бўлиб ўтган музокараларда Трампнинг махсус вакили Стив Уиткофф ҳам қўллаб-қувватлаган.