Россия ва Сурия ўртасидаги музокаралар натижасида Москвага тегишли икки асосий ҳарбий база — Ҳмеймим аэродроми ва Тартусдаги моддий-техник таъминот нуқтаси бўйича ҳали охирги қарорга келинмади. Бу ҳақда Сурия Ташқи ишлар вазири Асад аш-Шайбоний маълум қилди; у ўтган даврдаги келишувлар ҳозир “мақбул эмас” эканини таъкидлади.
Аш-Шайбонийга кўра, собиқ ҳокимият даврида Россия билан имзоланган барча келишувлар қайта кўриб чиқилиши ва уларнинг айримлари «қабул қилинмаслиги» мумкин. У алоҳида таъкидладики, янги форматдаги муносабатлар халқ манфаатига мувофиқ шакллантирилиши керак ва Сурия ўз ҳуқуқларини чекловчи имтиёзлардан воз кечмайди.
15 октябрда биринчи маротаба Москвани расмий ташриф билан зиёрат қилган Сурия президенти Аҳмад аш-Шаръа (аввалроқ ал-Жўлоний сифатида танилган) билан музокаралар икки соатдан ортиқ давом этди. Кремлдаги баёнотларга кўра, учрашувда Россиянинг ҳарбий объектлари келажаги алоҳида мавзу бўлган — 2017 йилда 49 йилга ижарага олинган бу базаларнинг статуси муҳокама қилинган.
Россия расмий вакиллари, жумладан МИДнинг матбуот котиби Мария Захарова, объектларнинг функционал кўринишини қайта шакллантириш бўйича ёпиқ музокаралар олиб борилаётганини айтди. Бу базалар Россияга Ўрта Ер денгизи ҳудудида таъсир ўтказишда муҳим имкониятлар берган.
Бир нечта суриялик манбалар Reuters’га аш-Шаръанинг Асадни экстрадиция қилишни талаб қилишини ва иқтисодий имтиёзлар, жумладан арзон ғалла таъминоти ҳамда уруш зарарларини қоплашни сўраётганини билдирган. Россиянинг бош вазирт ўринбосари Александр Новак эса нефт-энергетика ва инфратузилма реставрациясида иштирок этишга тайёрлигини айтиб ўтди.