Санкт-Петербургдаги Пулковo аэропорти 20 октябр тонгги соатларда вақтинча иш фаолиятини тўхтатди. Бунга сабаб — «Azerbaijan airlines» (AZAL) авиакомпаниясига тегишли Airbus A320-214 самолётнинг олд шассиси ишдан чиққани ва унинг қўниш пайтида учиш-қўниш йўлагидан чиқиб кетгани бўлди.
Аэропорт матбуот хизмати маълумотига кўра, Санкт-Петербургдан Бокуга йўл олган рейс техник носозлик туфайли Пулковода қўнишни сўраган. Расмий маълумотларга кўра, лайнер маҳаллий вақт билан соат 03:40 да аэропортга қайтиб қўнган, аммо қўниш пайтида учиш-қўниш йўлагидан чиқиб кетган. «Пулковo» ахборот маркази хабарида таъкидланишича, пассажирлар ва экипаж аъзолари жабрланмаган.
Таъкидланишича, Петербургдан Бокуга йўналган рейс илк парвозда керакли баландликка кўтарила олмаган. Олд шассиси ёпилмагани боис, самолёт бир неча соат давомида шаҳар осмонида айланиб, ёқилғини сарфлаб бўлгачгина фавқулодда қўнишни амалга оширган.
Ҳозирги пайтда аэропортда қутқарув ва тиббий хизматлар кучайтирилган ҳолда ишламоқда. Айрим рейслар кечиктирилган ёки бошқа аэропортларга йўналтирилган. Ҳозирда Пулковoда ҳолат барқарор, ва аэропорт маъмурияти яқин соатларда тўлиқ фаолиятни тиклашни режалаштирмоқда.
AZAL авиакомпанияси ҳозирча расмий баёнот бермаган, аммо Россия ва Озарбойжон авиация идоралари ҳодисани ўрганиш учун қўшма текширув гуруҳини ташкил этиши кутилмоқда.