Хитойнинг иқтисодий ўсиши 2025 йилнинг июл–сентябр ойларида пасайиб, 4,8 фоизни ташкил этди. Бу кўрсаткич 2024 йилнинг шу даврига нисбатан 5,2 фоиздан паст бўлиб, охирги бир йилдаги энг суст ўсиш ҳисобланди.
Расмий маълумотларга кўра, пасайиш АҚШ билан савдо кескинлашган шароитда қайд этилмоқда. Хитойнинг ноёб ер металларига бўлган экспортни чеклаши глобал электрон маҳсулот ишлаб чиқариш занжирига зарба берди ва Вашингтон билан тузилган нозик «савдо тўхташи» келишувини издан чиқарди.
Хитой Давлат статистика бюроси маълумот беришича, иқтисодиёт «чўкма босимларига қарамай барқарорлик ва салоҳиятни намоён этмоқда». Мамлакатдаги технологик сектор ва бизнес хизматлар ўсишнинг асосий двигатели сифатида кўрсатилди.
Пекин бу йил учун иқтисодий ўсишни «5 фоиз атрофида» деб белгилаган ва ҳукумат қўллаб-қувватлови орқали кескин пасайишнинг олдини олди. Ишлаб чиқаришда айниқса 3D-босма, робототехника ва электромобиллар соҳалари юқори суръатни сақлаб қолди.
АҚШ президенти Доналд Трамп Хитойнинг экспорт чекловларига жавобан мамлакатдан келтириладиган товарларга 100 фоизлик қўшимча тарифлар жорий этиш билан таҳдид қилди. АҚШ молия вазири Скотт Бессент бу ҳафта Малайзияда хитойлик расмийлар билан музокара ўтказиб, икки давлат раҳбарлари — Трамп ва Си Жинпин учрашувини ташкил этишни режалаштирмоқда.
Шу билан бирга, Хитойнинг сентябр ойидаги экспорт ҳажми 8,4 фоизга ошган, импорт кўрсаткичи ҳам ўсган. Иқтисодиётнинг хизматлар сектори, жумладан IT, консалтинг ва логистика йўналишлари барқарор ўсишда давом этган.