АҚШнинг собиқ президенти 82 ёшли Жо Байден даволанишни бошлагандан бери илк бор жамоатчилик олдида кўринди. У Делавер штатидаги Авлиё Иосиф черковида бўлиб ўтган маросимда қатнашиш учун борган. Бу ҳақда «The New York Post» нашри хабар берди.
Маълумотларга кўра, Байден бу жойда йиллар давомида мунтазам ташриф буюриб келади. Нашр эълон қилган фотосуратларда Байден ёнидаги аёлга суяниб тургани ва унинг ўнг кўзи устида яқинда ўтказилган жарроҳлик амалиётидан қолган яра изи кўриниб тургани қайд этилган.
Маълумотларга кўра, Байденда простата бези саратонининг сўнгги — тўртинчи босқичи аниқланган ва касаллик суякларга тарқалган. У беш ҳафталик нурланиш ва гормонал терапия курсини бошлаган. Шифокорлар ташхисни у сийдик чиқаришдаги муаммолар билан шифокорга мурожаат қилганидан кейин қўйган. Текширув натижасида унинг простата безида кичик тугун аниқланган.
Мазкур ташхисгача Байден икки марта тери саратонини олиб ташлаш операциясини ҳам бошидан кечирган. Биринчиси ўтган ой пешонасида, иккинчиси эса 2023 йилда кўкрак қисмида амалга оширилган.
Ибодат маросими тахминан 50 дақиқа давом этган, ундан кейин Байден маҳаллий аҳоли билан яна 10 дақиқа суҳбатлашган. Бу унинг даволаниш жараёни бошланганидан кейинги илк оммавий чиқиши бўлди.
Эслатиб ўтамиз, Байден 2024 йил июл ойида Доналд Трамп билан бўлиб ўтган муваффақиятсиз дебатдан сўнг қайта сайланиш кампаниясини тўхтатган ва Камала Харрис номзодини қўллаб-қувватлаган эди.