Ғазо ҳукумати маълумотларига кўра, 10 октябрда Ғазода ўт очишни тўхтатиш режими кучга кирганидан бери Исроил кучлари томонидан камида 97 фаластинлик ҳалок бўлди ва 230 нафари яраланди. Якшанба куни эса 21 та қоидабузарлик қайд этилди.
Ғазо ҳукумати матбуот хизмати баёнотида таъкидланишича, Исроил истилочилари ўт очишни тўхтатиш эълон қилинганидан бери халқаро гуманитар ҳуқуқни қўпол равишда бузган ҳолда 80 та ҳужжатлаштирилган қоидабузарликни содир этган.
Қоидабузарликлар орасида тинч аҳолига тўғридан-тўғри ўқ узиш, ўққа тутиш, қасддан нишонга олиш, «оловли тўсиқлар» яратиш ва фуқароларни ҳибсга олиш ҳолатлари қайд этилган.
Баёнотда айтилишича, Исроил қўшинлари ҳужумларни амалга ошириш учун ҳарбий техникалар, аҳоли пунктлари чеккасида жойлаштирилган танклар, масофадан бошқариладиган нишонга олиш тизимлари билан жиҳозланган электрон кранлар, самолётлар ва квадрокоптер дронлардан фойдаланган.
«Ушбу қоидабузарликлар Ғазонинг барча ҳудудларида истисносиз қайд этилган. Бу эса истилочи кучлар ўт очишни тўхтатиш режимига амал қилмаганини ва халқимизга қарши қотиллик ҳамда террор сиёсатини давом эттираётганини тасдиқлайди», дейилади баёнотда.
Ғазо ҳукумати Исроил кучларини қоидабузарликлар учун тўлиқ жавобгар деб ҳисоблаб, Бирлашган Миллатлар Ташкилоти ва келишувга кафил бўлган томонларни қоидабузарликларни тўхтатиш учун зудлик билан аралашишга чақирди.
АҚШ президенти Доналд Трамп таклиф этган режа асосида Фаластиннинг ҲАМАС гуруҳи ва Исроил ўртасидаги ўт очишни тўхтатиш тўғрисидаги келишув 10 октябр куни кучга кирди.
Битим Исроил қўшинларини босқичма-босқич олиб чиқиб кетишни, ўзаро асирларни алмашишни ва зудлик билан гуманитар ёрдамни киритишни назарда тутади.
Сулҳ Исроилнинг Ғазога қарши олиб борган икки йиллик урушини тугатишга қаратилган бўлиб, бу уруш оқибатида 68 мингдан ортиқ фаластинлик ҳалок бўлган, 170 мингга яқини ярадор бўлган ва Ғазо инфратузилмасининг аксарият қисми вайрон этилган.