Украина президенти Володимир Зеленский Украина хавфсизлик хизмати (СБУ)нинг Россиядаги стратегик бомбардимончи самолётларга қарши амалиёти ҳақида янги тафсилотларни маълум қилди. Унинг таъкидлашича, операциянинг тайёргарлик жараёни бир йил олти ой ва тўққиз кун давом этган. У бундан «тарихий натижа» сифатида фахрланишини айтди.
Зеленскийнинг сўзларига кўра, махфий операциянинг «офиси» Россия ҳудудларидан бирида, тўғридан тўғри ФСБ бошқармаси яқинида жойлашган бўлган. Зарба бериш учун 117 та дрон ишлатилган. Украин операторлар учта вақт зонасида фаолият юритган ва барча иштирокчилар ўз вақтида Россия ҳудудидан эвакуация қилинган.
Россия Мудофаа вазирлиги амалиёт оқибатида Мурманск, Иркутск, Иваново, Рязан ва Амур областларида жойлашган ҳарбий аэродромлар зарбага учраганини расман тасдиқлади. Хусусан, Мурманск ва Иркутскда бир неча самолёт техникаси ёниб кетган.
Россия расмийлари бу ҳужумларда «Киев режими»ни айблади ва бир неча гумонланувчилар қўлга олинганини билдирди. Бироқ уларнинг шахси ёки айбловлар ҳақида маълумот ошкор қилинмади.
СБУ маълумотига кўра, амалиёт натижасида Россиянинг асосий аэродромларида жойлашган қанотли ракета ташувчи самолётларнинг 34 фоизи йўқ қилинган. Уларнинг умумий қиймати 7 млрд доллар деб баҳоланмоқда.
Зеленский бу амалиёт Украина ҳарбийларининг қобилияти ва режалаштириш даражасини намоён этганини таъкидлади. Унинг сўзларига кўра, бу воқеалар «тарих дарсликларига албатта киради». Шу билан бирга, у Россия томонидан яқин вақтда эҳтимолий оммавий зарбага тайёр туриш кераклигини огоҳлантирди.
Аввалроқ Украина Хавфсизлик хизмати (СБУ) 1 июн куни «Паутина» («Ўргимчак тўри») деб номланган махсус ҳарбий амалиёт доирасида Россиянинг стратегик ҳарбий авиациясига қарши катта ҳужумни амалга оширгани маълум қилинган эди.