Хитой АҚШ томонидан киритилган янги савдо чекловларига жавобан Вашингтонни 2024 йил 17 январдаги келишувни ҳамда Женевадаги сўнгги келишувни бузганликда айблади. Хитой Савдо вазирлиги буни мамлакат манфаатларига тўғридан тўғри таҳдид сифатида баҳолаб, зарур ҳолда «қатъий ва қаттиқ чоралар» кўрилишини маълум қилди.
Вашингтон томонидан жорий этилган чекловлар сунъий интеллект чипларини экспорт қилишга, чип-дизайн учун дастурий таъминот сотилишига ҳамда Хитойлик талабаларга визалар бериш жараёнига тааллуқли. «The New York Times» маълумотига кўра, АҚШ Хитойга реактив двигателлар ва юқори технологияларни етказиб беришни ҳам чекламоқда.
Мазкур вазият молия бозорларига ҳам таъсир кўрсатди. Ҳонгконгдаги хитой акциялари индекси сўнгги икки ойда биринчи марта 2,9 фоизга пасайди. Шу билан бирга, АҚШдаги фючерс бозорида ҳам пасайиш кузатилди.
АҚШ президенти Доналд Трамп эса Хитойни қасддан нодир ерости металлари етказиб бериш суръатини секинлаштираётганликда айблади. Шу билан бирга, Пекин Пентагон раҳбарининг Тайванга таҳдид ҳақидаги баёнотини кескин танқид қилди.
Шу ҳафта Трамп ва Си Жинпинг ўртасида телефон орқали суҳбат бўлиб ўтиши кутилмоқда. Аммо суҳбат санаси ҳали расман белгиланмаган. Президент маслаҳатчиси Кевин Ҳассетт бу сўзлашувдан «катта умид» кутилаётганини билдирган.