АҚШнинг халқаро майдондаги нуфузи охирги ойларда жиддий равишда заифлашгани қайд этилди. Morning Consult халқаро тадқиқот ташкилоти томонидан ўтказилган сўров натижаларига кўра, АҚШга бўлган ишонч ҳам сиёсий, ҳам иқтисодий жиҳатдан пасайган.
Жаҳон бўйлаб истеъмолчилар Америка компаниялари ва маҳсулотларидан юз ўгиришни бошлаган. 41 давлатда ўтказилган сўровда АҚШнинг соф ижобий рейтинги −1,5 фоизни ташкил этган бўлса, Хитойнинг рейтинги +8,8 фоизга етган.
2024 йил январда АҚШнинг рейтинги +20 фоиздан юқори бўлган, Хитой эса салбий зонада эди. Бироқ Доналд Трамп президентликка қайтганидан сўнг АҚШнинг халқаро имижи пасайиб, Хитойга бўлган муносабат ижобий тус олган.
Morning Consult таҳлилида таъкидланишича, 2025 йил январидан бери дунё мамлакатларининг катта қисмида АҚШга нисбатан муносабат ёмонлашган, Хитойга бўлган муносабат эса яхшиланган. АҚШнинг имижи қисқа муддатга фақат Россияда яхшиланган.
Сиёсий нуфузнинг пасайиши иқтисодий кўрсаткичларда ҳам акс этмоқда: АҚШга туристлар оқими камаймоқда, доллар қурида пасайиш кузатилмоқда ва америкалик активларга бўлган қизиқиш сўнмоқда.
Шу билан бирга, Politico нашрининг маълум қилишича, дунё бўйича энг паст нуфузга эга давлат сифатида Исроил қайд этилган. Айниқса, Жанубий Осиё ва Яқин Шарқ мамлакатларида Исроилга нисбатан салбий муносабат кескин ўсган. Бу Ғазо ва Ғарбий соҳилдаги ҳарбий ҳаракатлар билан боғлиқ экани айтилмоқда.