Трамп маъмурияти Украинадаги уруши давом этаётган Россияга қарши қаттиқ санкциялар ўрнига, Москва билан дипломатик алоқаларни ривожлантиришга устувор аҳамият бермоқда. Шу сабабли, улар Сенатдаги асосий ташаббускорлардан бири — сенатор Линдси Грэҳэм офисига мурожаат қилиб, лойиҳадаги айрим формулировкаларни ўзгартиришни сўраган, деб ёзмоқда The Wall Street Journal.
Хусусан, санкциялар қўлланилиши шартлигини кўрсатадиган «мажбурий» ифода — «шарт» сўзини «мумкин» дегани билан алмаштириш таклиф қилинган. Бу президентга санкцияларни ўз хоҳишига кўра жорий этиш имконини беради. Конгрессдаги манбаларнинг таъкидлашича, бундай ўзгартишлар қонуннинг таъсир кучини анча камайтиради.
Лойиҳа муаллифларидан бири, демократ сенатор Ричард Блюментал ушбу музокараларнинг мавжудлигини тасдиқлади. Унинг сўзларига кўра, Оқ уй бу жараёнда фаол иштирок этмоқда, аммо муҳокама тафсилотларини ошкор этмади.
Трамп маъмурияти вакилларидан бири эса, президент ташқи сиёсатда фаолият юритиш ҳуқуқига эга эканини таъкидлаб, санкциялар механизми етарлича эгрилик билан таъминланиши кераклигини билдирди.
Лойиҳани 80 нафардан ортиқ сенатор қўллаб-қувватлаган. У Россия нефти, гази, урани ва бошқа ресурсларини харид қилаётган учинчи давлатларга қарши қаттиқ чекловларни назарда тутади. Хусусан, бу мамлакатлардан олиб кириладиган товарларга 500 фоизлик тариф жорий этилиши мумкин.
Грэҳэм аввалроқ Европа иттифоқи давлатларини санкцион босимдан ҳимоя қилиш мақсадида, Украинага ёрдам берувчи давлатларга истисно берилишини қўллаб-қувватлашини айтганди. Бироқ у ҳозирча Трамп маъмурияти талаб қилаётган барча ўзгартиришларга рози бўлмаган.
Бу орада, Грэҳэмнинг Киевга сўнгги ташрифи чоғида у Сенатда ушбу ҳужжат бўйича муҳокамалар шу ҳафта бошланишини маълум қилган ва Трампга «Путинга босим ўтказиш учун қўшимча воситалар» берилишини маъқуллаган.