Яқин-яқингача иттифоқчи бўлган Трамп ва Маск бир неча кун ичида ашаддий душманларга айланишди ва бир-бирларини очиқча танқид қилишга ўтди — шартномаларни бекор қилиш таҳдидидан тортиб, Эпштейн ишига алоқадорликка ишора қилиш ва импичмент чақириқларигача.
Илон Маск ва Доналд Трамп орасида очиқ можаро миллиардер республикачиларнинг «катта гўзал солиқ имтиёзлари лойиҳаси»ни «бесунақай, жирканч ва расво» деб аташи ортидан бошланди. Унинг фикрича, бу ҳужжат бюджет тақчиллигини янада кучайтиради. Маск Трамп томонидан «катта ва чиройли», деб аталаётган иушбу қонун лойиҳасини қўллаб-қувватлаган республикачилардан интиқом олишини ваъда қилди. Трамп аввал бошда жим турди, аммо пайшанба куни Овал кабинетда журналистларга «Илондан ҳафсалам пир бўлди», дея баёнот берди.
Доналд Трамп Илон Маск компаниялари билан барча субсидия ва шартномаларни тўхтатишни таклиф қилди ва буни «миллиардлаб доллар тежашнинг энг осон йўли», деб атади. Маск эса жавобан президентни очиқча масхара қилди, унинг «дублёри» пайдо бўлганини айтиб, янги сиёсий партия тузиш вақти келганини ишора қилди.
Маск импичментга чақирувчи постларни қўллаб-қувватлади ҳамда Эпштейн иши бўйича ҳужжатларда президент номи қайд этилиши мумкинлигини билдирди. «Эпштейн файллари» — маҳкум этилган молиячи ва жинсий зўравон ҳақидаги ҳужжатлар — алоқалар, хусусий самолётлардаги парвозлар, Эпштейн резиденцияларига ташрифлар ва вояга етмаганларни эксплуатация қилишда иштирок этиш ҳақида маълумотларни ўз ичига олади. Рўйхатларда шаҳзода Эндрюдан бошлаб CIAнинг собиқ раҳбари Уилям Бёрнсгача бўлган ўнлаб таниқли исмлар бор.
Трамп эса Маскни иккиюзламачиликда айблади: гўёки Маск бюджетдан электромобиллар учун субсидиялар қисқартирилгани учун ғазабланган. «У мен бефойда электромобиллар учун мажбуриятни олиб ташлашимни билганди ва шунчаки АҚЛДАН ОЗДИ», — деб ёзди Трамп.
Маск 2024 йилда Трампнинг ғалабаси учун 275 млн доллар сарфлаган ва 2026 йилги оралиқ парламент сайловларигача яна 100 млн доллар беришга ваъда қилган эди. Аммо бу янги маблағни ҳалигача ўтказгани йўқ — ва энди, эҳтимол, умуман ўтказмайди, деб ёзади NYTimes.
Бунга жавобан Трамп Маск компанияларини миллиардлаб долларлик шартномалардан маҳрум қилиш билан таҳдид қилмоқда, президент атрофида эса собиқ иттифоқчи билан узоқ курашишга тайёргарлик кўрилмоқда. Бу кураш технологик ва сиёсий лагерларни ҳам бўлиб ташлаши мумкин.
Трамп ва Маск ўртасидаги жаналга бозор ҳам дарҳол реакция қилди: Tesla акциялари 14 фоизга арзонлашди, Trump Media & Technology Group — Truth Social’нинг она компанияси — акциялари эса 8 фоиз қиймат йўқотди. Трамп билан можаро Маскнинг бойлигига ҳам зарба берди: унинг мулки бир суткада 34 млрд долларга камайди.
Эпштейндан ўнгдаги суратда — Гислейн Максвелл. У 2021 йил декабрида Эпштейн учун вояга етмаганларни эксплуатация қилишда ёрдам берганликда айбланиб, айбдор деб топилган. Суднинг аниқлашича, Максвелл унга ўсмир қизларни топиб берган ва ўзи ҳам зўравонликда иштирок этган, Эпштейндан миллионлаб доллар олган. 2022 йилда у 20 йилга қамалган. У қамалганидан сўнг, Трамп (президентлик даврида) Оқ уйдаги брифингда унга «омад тилаган» эди.
Сўнгги янгиликларга кўра, Маск Трамп Эпштейн иши ҳужжатларида қайд этилгани ҳақидаги хабарини ўчирди
«Энди ҳақиқий бомба ташлаш вақти келди: Дональд Трамп Эпштейн файлларида қайд этилган. Улар нега оммага эълон қилинмаганининг асл сабаби ҳам шу. Омад, Трамп!» — дейилган эди тадбиркор 5 июнь куни жойлаган хабарда. Ҳозирда бу хабар ўчирилган.
Ушбу хабар чоп этилган вақтда Маск хабарни нега ўчирганига изоҳ бермаган.