Бу ҳақда Трампнинг собиқ маслаҳатчиси Стив Бэннон маълум қилди, деб ёзмоқда The Washington Post нашри.
Бэннонга кўра, Маск ва Бессент давлат солиқ хизмати раҳбарлигини ким эгаллаши кераклиги ҳақида ўз фикрларини билдириш учун Овал кабинетга киришган. Президент Доналд Трамп Бессентнинг номзодини қўллаб-қувватлаган.
Кейинроқ, улар коридорда бир-бирини ҳақорат қила бошлаган. Бессент Маскнинг давлат харажатлари бўйича 1 трлн доллар миқдоридаги фирибгарликларни очиқлаш ваъдасини эслаб, уни бажара олмагани учун Маскни ёлғончи деб атаган.
Бэнноннинг айтишича, шу пайт Маск «регби ўйинчиси каби» елкаси билан Бессентнинг кўкрагидан туртиб юборган. Бессент эса унга жавобан зарба берган. Воқеага бир неча киши аралашган ва Маск ғарбий қанотдаги эшикдан чиқариб юборилган.
«Президент Трамп бу жанжал ҳақида эшитиб, «Бу энди ҳаддан ошиш», деганди», – дея қўшимча қилган Бэннон.