Бу ҳақда The New York Times нашри Ares Leaks ҳакерлар гуруҳи қўлга киритган ва Ғарб разведка хизмати томонидан тасдиқланган саккиз бетлик ички ҳужжатга таянган ҳолда ёзмоқда.
Ҳужжатга кўра, ФСБнинг аввал оммага маълум бўлмаган бўлими Хитойни Россиянинг хавфсизлигига жиддий таҳдид сифатида баҳолайди. Унда Хитой махсус хизматларининг россиялик агентларни ёллаш, ҳарбий технологияларга кириш ҳамда илмий соҳада норозилик билдирган олимларни ўз томонига оғдириш ҳаракатлари қайд этилган.
Шунингдек, ФСБ Хитойни Украинадаги рус армияси ҳаракатларини назорат қилиб, Ғарб қуроллари ва стратегияларини ўрганаётганликда айбламоқда. Хитой илмий муассасалари ва кон-саноат компаниялари орқали Арктикада фаол разведка олиб бораётгани ҳам таъкидланган.
NYTʼнинг ёзишича, бу ҳужжат икки мамлакат ўртасидаги расман дўстона муносабатларга қарамай, жиддий разведка кураши мавжудлигини очиб беради. Қизиғи шундаки, Россиянинг Украинага босқинидан бор-йўғи уч кун олдин ФСБ «Антанта-4» деб номланган янги контрразведка дастурини қабул қилган — номига қарамай, дастур Хитой шпионажига қарши курашни назарда тутган.
ФСБ фикрига кўра, Россия ўз эътиборини Украинага қаратган бир пайтда Хитой шарқдаги ҳолатдан фойдаланишга уриниши мумкин эди. Шу сабаб, Пекин фаолиятини ўрганиш кучайтирилган. Россиялик амалдорлар, тадқиқотчилар ва журналистлар Хитой билан алоқада бўлгани учун таҳлил ва кузатувга олинган.
Шу билан бирга, WeChat мессенжери фойдаланувчиларини кузатиш, қурилмаларни бузиш ва махсус дастурлар орқали маълумот тўплаш каби чоралар белгилаб қўйилган. The New York Times бу ҳужжатни Хитой масаласидаги Россия контрразведкасининг энг мукаммал таҳлили деб баҳолади.
Шу билан бирга, NYTʼнинг таъкидлашича, шпионаж ва ҳудудий шубҳаларга қарамай, Хитой ҳозир ҳам Россиянинг энг йирик иқтисодий ҳамкори бўлиб қолмоқда. Айниқса, нефт хариди, микрочиплар, дастурий таъминот ва қўш мақсадда қўлланувчи қисмларни етказиб бериш орқали Пекин Москвага Ғарб санкцияларининг таъсирини юмшатишда ёрдам бермоқда.