Марказий банк молиявий барқарорлик бўйича эълон қилган ҳисоботда қайд этилишича, аҳолининг катта қисми ўзининг ёки оила аъзоларининг кредит мажбуриятларини ўз вақтида адо этишда муаммоларга учрамоқда. Ушбу маълумотлар йил бошида 3 546 нафар иштирокчи ўртасида ўтказилган сўров натижаларига асосланган.
Иштирокчиларнинг ярми тўрт ёки беш нафарлик оилада яшайди. Улар молия, таълим, қишлоқ хўжалиги, савдо ва тиббиёт соҳаларида фаолият юритишади. Сўровда қатнашганларнинг 78 фоизи ойлик даромади 12 миллион сўмгача эканини билдирган, шулардан тўртинчи қисми қўшимча даромадга эга.
Респондентларнинг 73 фоизида банк ёки банкдан ташқари кредит мажбурияти бор. Улардан 64 фоизи банкка, 19 фоизи эса бошқа манбаларга ҳам қарздор. Қарзларнинг 43 фоизи уй-жой сотиб олиш ёки таъмирлаш, автомашина ва маиший техника сотиб олиш учун олинган.
Фақатгина 5 фоиздан кам респондентлар тўй, даволаниш ёки тадбиркорлик мақсадида кредит олганини билдирган.
Қарздорлик юки ҳақида гап кетганда, сўровда қатнашганларнинг 70 фоизи ойига 6 млн сўмгача тўлов амалга оширади. Улардан 25 фоизининг ойлик тўлови 2−4 млн сўмни ташкил этади. Қарз тўлаш муддати 2−5 йил ва ундан ортиқ бўлганлар ҳам кўпчиликни ташкил этмоқда.
Таҳлилларга кўра, қарздорларнинг 64 фоизи тўловда қийинчиликка дуч келмоқда. Шулардан ярми кейинги олти ойда молиявий аҳволи яхшиланишига умид билдирган. 41 фоизи ҳеч қандай ўзгариш бўлмаслигини айтган, 11 фоизи эса ёмонлашиши мумкинлигини билдирган.
Келгуси ярим йилда яна қарз олишга эҳтиёж борлигини 20 фоиз аҳоли тан олган. Улар маблағни асосан уй-жой хариди ёки таъмирлашга йўналтиришни режалаштирмоқда.
Жорий йилнинг биринчи чорагида фуқаролар томонидан олинган кредитларнинг ярмидан кўпроғи микроқарзлар ҳиссасига тўғри келди. Микроқарзлар ҳажми 2,3 баробарга ошиб, 18,7 трлн сўмни ташкил этди. Микрокредитлар эса 1,9 баробарга ўсиб, 5,5 трлн сўмга етди.