АҚШ президенти Доналд Трампнинг янги савдо чекловлари ҳақидаги сўнгги баёнотлари Америка валютасининг навбатдаги қадрсизланишига сабаб бўлди.
Лондоннинг ICE биржасида АҚШ доллари индекси 2025 йилда иккинчи марта уч йиллик энг паст кўрсаткични қайд этиб, 0,81 фоизга — 97,789 пунктгача тушди. TradingView маълумотларига кўра, индекс охирги марта 2022 йил 31 мартда шундай паст даражада бўлган.
Тошкент вақти билан соат 17:13 га келиб, индекс қисман тикланиб, 97,877 пункт (-0,72 фоиз)ни ташкил этди.
Доллар индекси — бу АҚШ валютасининг олтита асосий жаҳон валютасидан иборат махсус валюта саватчасига нисбатан қийматини кўрсатувчи кўрсаткич. Ушбу саватчага евро, иена, фунт стерлинг, Канада доллари, Швеция кронаси ва Швейцария франки киради.
Доналд Трамп яқин ҳафталарда савдо ҳамкорларига янги тариф ставкалари ҳақидаги хатларни юборишни режалаштирганини маълум қилганидан сўнг, долларнинг қулаши янада кучайди. Келгуси ойда «ўзаро» деб номланувчи божлар бўйича 90 кунлик танаффус якунланади. Financial Times нашрига кўра, Трампнинг баёнотидан кейин доллар валюта саватига нисбатан 0,8 фоизга арзонлашди.
Савдо таҳдидларидан ташқари, АҚШда кутилганидан паст инфляция ҳам доллар курсига таъсир кўрсатди. Бу эса Федерал захира тизимининг фоиз ставкаларини пасайтириш эҳтимолини оширди. Шу билан бирга, Европа Марказий банки ставкаларни пасайтириш даври тугаши мумкинлиги ҳақида ишора берди, бу эса евронинг ўсишига туртки бўлди.
Таҳлилчиларнинг айтишича, савдо зиддиятларининг кучайиши долларга нисбатан босимни давом эттирмоқда.
Эслатиб ўтамиз, 2025 йил 2 апрель куни Трамп 185 та мамлакат ва ҳудуддан олиб кириладиган маҳсулотларга божхона божлари жорий этилганини эълон қилган эди. Бу эса доллар индексининг кескин ўзгаришларга юз тутишига сабаб бўлди: январь ойида қайд этилган 110,176 пунктлик маҳаллий юқори кўрсаткичдан сўнг индекс изчил пасайишни бошлади, гоҳ-гоҳида йўқотишларнинг бир қисмини тиклаб турди. Индекснинг сўнгги жиддий пасайиши апрел ойида кузатилди — ўшанда у 100 пунктдан пастга тушиб кетган эди.