Норвегиянинг Осло Тинчлик тадқиқотлари институти (PRIO) томонидан эълон қилинган ҳисоботга кўра, 2024 йил дунё бўйлаб қуролли тўқнашувлар сони бўйича энг юқори даражага етган йил сифатида тарихда қолди. Ҳисоботда келтирилишича, ўтган йили 36 давлатда жами 61 та қуролли можаро қайд этилган.
Бу можаролардан 11 таси тўлиқ урушга айланган ва ҳар бирида камида минг киши ҳалок бўлган. PRIO маълумотларига кўра, икки асосий уруш — Россия ва Украина ўртасидаги можаро ҳамда Исроилнинг Ғазога қарши ҳаракатлари — глобал зўравонликда етакчи рол ўйнади. Россия-Украина урушида тахминан 76 минг киши ҳалок бўлган бўлса, Ғазодаги жангларда тинч аҳолига мансуб 26 минг қурбон қайд этилган, уларнинг кўпчилиги аёллар ва болалардан иборат.
2023 ва 2024 йилларда қуролли тўқнашувлар натижасида 129 минг киши ҳалок бўлгани қайд этилган. Бу сўнгги 30 йилдаги ўртача кўрсаткичдан анча юқори ҳисобланади.
Тадқиқотларга кўра, қуролли тўқнашувлардан энг кўп жабр кўрган ҳудуд — Африка. 2024 йилда қитъанинг 28 та давлатида ички қуролли можаролар кузатилган ва бу ўн йил олдинги кўрсаткичдан икки баравар кўп. Африкадан сўнгги ўринда 17 можаро билан Осиё, 10 можаро билан Яқин Шарқ, 3 можаро билан Европа ва 2 можаро билан Америка қитъаси қайд этилган.
Шу билан бирга, турли маҳаллий гуруҳлар ва тўдалар ўртасидаги қуролли тўқнашувлар сони 2023 йилдаги 80 тадан 2024 йилда 74 тага камайган.
PRIO директори Сири Аас Рустаднинг таъкидлашича, бугунги дунё ўн йил аввалга нисбатан анча зўравон ва ноаниқ. У изоляция сиёсатини давом эттириш инсоният учун жиддий оқибатларга олиб келиши мумкинлигини билдирди.
Шунингдек, Вашингтон ва Теҳрон ўртасидаги ядровий музокаралар муваффақиятсизликка учраши мумкинлиги ҳақида хавотирлар кучаймоқда. АҚШ президентининг сўзларидан сўнг Пентагон Яқин Шарқдаги баъзи ҳудудлардан дипломатик миссияларни эвакуация қилишга тайёргарлик кўра бошлаган.