Ҳиндистоннинг Аҳмадобод шаҳрида ҳалокатга учраган Boeing 787-8 Dreamliner учоғида биринчи бўлиб топилган тирик инсон — Буюк Британия фуқароси Вишваш Кумар Рамеш бўлди. Бу ҳақда Hindustan Times нашри хабар берди.
Омон қолган йўловчининг айтишича, учоқ ҳавога кўтарилганидан 30 сония ўтиб «жуда кучли овоз» эшитилган ва шундан кейин «учоқ ерга келиб урилиб, портлаган». Рамешнинг тушунтиришича, ҳушига келган пайти атрофида фақат жасадлар бўлган, у қаттиқ қўрқиб, зудлик билан кўзларини очиб югурган. Бир киши уни тўхтатиб, «Тез ёрдам» машинасига ўтқазган ва шифохонага жўнатган.
Ani агентлиги Аҳмадободдаги ҳалокат жойидан бир киши тирик топилганини аввалроқ хабар қилган эди. Полиция комиссари маълум қилишича, Вишваш Кумар Рамеш 11А ўриндиғида топилган.
Ҳалокатга учраган учоқ саҳнида жами 242 киши бўлган — 230 нафар йўловчи, 2 нафар учувчи ва 10 нафар борт кузатувчиси. Йўловчилар орасида 169 нафари Ҳиндистон, 53 нафари Буюк Британия фуқароси бўлган. Учоқда яна 7 нафар португалиялик ва 1 нафар канадалик ҳам бўлган. Бундан ташқари, ерда ҳам ҳалок бўлганлар бор. Авиаҳалокатнинг умумий қурбонлари сони 315 кишига етди, деб хабар бермоқда New Indian Express нашри.
Бундан ташқари, Hindustan Times маълумотига кўра, учоқда Гуджарат штати собиқ раҳбари Виджай Рупани ҳам сафар қилган.
Ҳозирча ҳалокатнинг аниқ сабаблари аниқланмаган. Тергов ишлари бошланган. Ҳиндистон расмийлари ва халқаро авиация мутахассислари биргаликда ҳолатни ўрганмоқда.