Американинг машҳур спорт кийимлари бренди Nike ўз тарихида илк бор Ҳиндистон бренди билан дизайнерлик ҳамкорликни йўлга қўйди. Деҳлида жойлашган NorBlack NorWhite билан ишлаб чиқилган мазкур коллекция анъанавий ҳинд «бандҳани» боғлаш-боёш техникасидан илҳомланган.
Жилолар, футболкалар, спорт бралари ва машҳур Air Max кроссовкалари замонавий кўринишда қадимий геометрик нақшлар билан безатилган. Ҳиндистонлик крикетчилар Жемима Родригес ва Шафали Верма, курашчи Аншу Малик ҳамда югуриш бўйича спринтер Прия Моҳан иштирок этган реклама компанияси Жайпур шаҳрида суратга олинган.
NorBlack NorWhite 2010 йилда Ҳиндистонга кўчиб келган канадалик дизайнерлар Мрига Кападия ва Амрит Кумар томонидан ташкил этилган. Ушбу бренд ҳинд қўл меҳнати анъаналарини кўчадаги мода билан уйғунлаштириши билан танилган.
Nike ушбу лойиҳа орқали Ҳиндистон бозоридаги мавқеини мустаҳкамлашга умид қилмоқда. Компания 1995 йили лицензия асосида бозорга кирган бўлиб, кейинчалик ҳеч қандай катта тижорат муваффақиятига эриша олмаган. 2019 йилга келиб, дўконлар сони 350 тадан 150 тагача қисқарган. Ҳозирда бренднинг Ҳиндистонда 93 та дўкони бор, бу Хитойдаги 2 600 та дўконга нисбатан анча кам.
Nike шунингдек, аёллар спорт кийимлари сегментини ривожлантиришга алоҳида эътибор қаратаётганини маълум қилди. Бу коллекция ҳам шундай мақсадга хизмат қилиб, ҳинд аёлларини спорт ва фаол ҳаётга жалб қилишни кўзлаган.