Британия разведкаси маълум қилишича, Россиянинг Қурск областида жойлаштирилган Шимолий Корея Қуролли Кучларининг 6000 нафардан зиёд ҳарбийси ҳалок бўлган. Бу жами 11 000 нафарлик контингентнинг ярмидан кўпини ташкил этади. Ушбу маълумотлар Британия Мудофаа вазирлигининг Х ижтимоий тармоғидаги расмий саҳифасида эълон қилинди.
Манбада таъкидланишича, бу йўқотишлар асосан пиёда армиянинг узоқ ва оғир жангларда қатнашиши натижасида юзага келган. Шу билан бирга, КХДР кейинчалик Қурск вилоятига чекланган миқдорда қўшимча кучлар жўнатгани ҳам қайд этилган.
Маълумотга кўра, 4 июн куни Россия Хавфсизлик кенгаши котиби ва собиқ мудофаа вазири Сергей Шойгу КХДРга ташриф буюриб, мамлакат етакчиси Ким Жонг Ун билан учрашган. Бу сўнгги уч ой ичида Шойгунинг Корея Халқ Демократик Республикасига иккинчи ташрифи бўлган.
Британия томонининг баҳолашича, Шойгу Россиянинг Украинадаги қонуний бўлмаган ҳарбий амалиётига Шимолий Кореянинг ёрдамини жалб этиш бўйича музокараларда асосий воситачи бўлган. Ҳозирча КХДР ҳарбий ҳаракатлари фақат Қурск вилояти билан чекланган. Агар Шимолий Корея қўшинлари Украина ҳудудига жўнатилиши лозим бўлса, бу қарор фақат Россия президенти Владимир Путин ва КХДР етакчиси Ким Жонг Уннинг шахсий маъқуллаши билан амалга ошиши мумкин.