Трамп саммит давомида «катта ишлар» туфайли тезда қайтишини таъкидлади. Оқ уй Миллий хавфсизлик кенгашининг шошилинч йиғилиши чақирилганини маълум қилди. АҚШ мудофаа вазири Пит Хегсетх минтақадаги мудофаа салоҳиятини кучайтириш учун қўшимча ҳарбий кучлар юборилишини эълон қилди. Бироқ расмийлар АҚШ Исроилнинг ҳужум операцияларида бевосита иштирок этмаслигини таъкидламоқда.
Трамп саммит чоғида Британия билан янги савдо келишувини имзолади, аммо Украина президенти Володимир Зеленский ва Мексика раҳбари Клаудия Шейнбаум билан режалаштирилган учрашувларда иштирок этмайдиган бўлди.
Президент ижтимоий тармоқдаги баёнотида Эрон ядровий қуролга эга бўлмаслиги кераклигини яна бир бор такрорлади ва Теҳрон аҳолисини шаҳарни дарҳол тарк этишга чақирди. Шу пайтда Эрон пойтахтида портлашлар ва ҳаво мудофаа тизимлари ишлагани ҳақида хабарлар тарқалди. Исроилда ҳам Тел-Авивда тунда хавф сигналлари янгради.
G7 саммити иштирокчилари Трампнинг кетишини тўғри қабул қилишди. Франция президенти Эммануэл Макрон «агар АҚШ можарони тўхтатишга эриша олса, бу яхши натижа», деб таъкидлади.
Саммитнинг якунида Эрон-Исроил можаросини юмшатиш ва тинч аҳоли муҳофазасини таъминлаш ҳақида баёнот қабул қилиниши кутилмоқда эди. Аммо Трамп мазкур баёнотни рад этиш ниятида экани маълум қилинди.
Шу билан бирга, Трамп саммитда Россиянинг G8дан чиқарилиши «катта хато бўлганини» айтди. Унга кўра, Россия президенти Владимир Путин фақат унга гапиради ва бу можарода АҚШнинг иштироки ҳал қилувчи аҳамиятга эга.