Dodo Brands компанияси 2025 йил июн ойида ўз штаб-квартирасини расман Қозоғистонга, Астана Халқаро молия марказига (AIFC) кўчирди. Бу ҳақда AIFC расмий баёнотида маълум қилинди. Аввал компания Британ Виргин оролларида рўйхатдан ўтган эди.
Мақсад – халқаро фаолият учун қулайроқ ҳуқуқий ва молиявий муҳит яратиш. Экспертлар таъкидлашича, Қозоғистон Россия компаниялари учун Британ Виргин оролларига нисбатан анча қулай ҳуқуқий ва солиқ муҳитига эга. Айниқса, 2022 йилда Украинага уруш бошланганидан кейин Россия томонидан Британ ҳудуди «ноқулай юрисдикция» деб эълон қилинган.
Dodo Brands 2011 йилда Фёдор Овчинников томонидан ташкил этилган бўлиб, ҳозиргача 26 давлатда 1 300 дан зиёд ресторан ва қаҳвахонага эга. 2024 йилда компаниянинг йиллик даромади 117,6 млрд рублни ($1,49 млрд) ташкил этган бўлса, 2025 йилнинг биринчи чорагида бу кўрсаткич 33,3 млрд рублга ($423,6 млн) етган.
Dodo Brands бош директори Дмитрий Соловьёвга кўра, Қозоғистонга кўчиш мантиқий қарор бўлди: компаниянинг корпоратив офислари ва халқаро операцияларининг катта қисми айнан шу ерда жойлашган.
Айни пайтда, Қозоғистонда 40 дан зиёд халқаро компаниялар ўз активлари билан AIFC ҳудудига кўчиб ўтган. Россия эса ўзидаги махсус иқтисодий зоналарга 500 компанияни қайта рўйхатдан ўтказган.