2025 йил 16 июн куни Илҳом Ҳайдаров Ўзбекистоннинг Туркиядаги янги фавқулодда ва мухтор элчиси сифатида Анқарага етиб келди. Шу куни у Туркия Ташқи ишлар вазирлигининг Протокол департаменти раҳбари, элчи Ахмет Жемил Мираоғлуга ишонч ёрлиқлари нусхасини топширди.
Томонлар ўртасидаги музокараларда икки мамлакат ўртасидаги стратегик шерикликни янада чуқурлаштириш, халқаро ташкилотлар, жумладан, 21−22 июн кунлари Истанбулда бўлиб ўтадиган Ислом ҳамкорлик ташкилоти Ташқи ишлар вазирлари кенгашининг 51-сессиясидаги ҳамкорлик масалалари муҳокама қилинди.
Шунингдек, сиёсий маслаҳатлашувлар, ўзаро ташрифлар, маданий-гуманитар ва туризм соҳасидаги лойиҳаларни ривожлантириш, тадбиркорлик доиралари ўртасидаги алоқаларни фаоллаштиришга оид масалалар юзасидан фикр алмашилди.
Ахмет Жемил элчига дипломатик фаолиятида муваффақият тилаб, DEIK — Туркиянинг ташқи иқтисодий алоқалар кенгаши билан яқин ҳамкорлик қилишда ёрдам беришга тайёр эканини билдирди.
Илҳом Ҳайдаров — 56 ёшда. У 2024 йил июлидан буён Ўзбекистон Ташқи ишлар вазирининг ўринбосари лавозимида ишлаб келаётган эди. Илгари Украинада элчи, «Ўзбекенгилсаноат» раҳбари ва Республика иш берувчилар конфедерацияси раиси лавозимларида фаолият юритган. У инглиз ва француз тилларини билади.
У Туркияда 2017−2025 йилларда элчи бўлган ва кейин Сенатнинг халқаро масалалар бўйича қўмитасига раис этиб сайланган Алишер Ағзамхўжаев ўрнини эгаллади.