G7 саммити доирасида 16 июн куни ўтган расмий кечки овқатда АҚШ президенти Доналд Трамп Россияга қарши санкциялар сиёсати бўйича ўзининг аввалги нуқтаи назарини яна бир бор тасдиқлади. Bloomberg манбаларига кўра, у Россияга нисбатан чекловларни кенгайтириш таклифларини рад этган ва бундай босим чоралари АҚШ учун ортиқча иқтисодий юк эканини айтган.
Бу ҳолат Европа Иттифоқи мамлакатлари орасида Трампнинг Москвага қарши қаттиқ санкцияларга амалий қадам ташлашига нисбатан шубҳаларни кучайтирган. Шу билан бирга, Европа давлатлари АҚШ билан мулоқотни давом эттираётган бўлса-да, Украинага мустақил ёрдам йўлларини излашга ва мудофаа ҳамкорлигини мустаҳкамлашга киришган.
Шу билан бирга, саммит якунлари бўйича Канада бош вазири Марк Карни эълон қилиши кутилган баёнотда G7 давлатларининг тинчлик музокараларини қўллаб-қувватлаши қайд этилади. Унда Украина оташкесимга тайёр экани, Россия эса бу борада ирода намоён этмаётгани таъкидланиши кутилмоқда. Баёнотда Москвага нисбатан босимни давом эттириш учун санкциялар механизмидан фойдаланиш лозимлиги ҳам ёритилади.
Европа Иттифоқи саммит олдидан Россияга қарши санкцияларнинг 18-пакетини таклиф қилди. Британия эса 17 июн куни Москвага қарши янги чекловларни, жумладан, энергия ва молия соҳаларига нисбатан санкцияларни эълон қилди. Бу мамлакатлар Россия нефт нархининг чегарасини пасайтиришни ҳам қўллаб-қувватламоқда.
Айни пайтда Россия Украина ҳудудларига кучайтирилган ҳаво ҳужумларини амалга оширмоқда. Киев маъмурияти маълумотига кўра, 17 июнга ўтар кечаси пойтахтдаги ҳаво ҳужуми натижасида камида 14 киши ҳалок бўлган. Украина президенти Володимир Зеленский буни «энг даҳшатли ҳужумлардан бири» деб атади ва Ғарб давлатларини қаттиқроқ жавоб қайтаришга чақирди.
Зеленскийнинг Доналд Трамп билан шахсий учрашуви 17 июн куни режалаштирилган эди, бироқ АҚШ президенти саммитни вақтидан олдин тарк этиб, Яқин Шарқдаги вазиятни ҳал этиш учун Вашингтонга қайтиб кетди.
Гарчи Трамп 7 июн куни Россияга нисбатан «қатъий санкциялар» қўллашга тайёрлигини баён этган бўлса-да, The Wall Street Journal’нинг ёзишича, унинг маъмурияти Конгрессда бу санкциялар пакетини юмшатиш бўйича музокаралар олиб бормоқда.