Ҳиндистон Ташқи ишлар котиби Викрам Мисрининг маълум қилишича, Моди ва Трамп сешанба куни кечқурун 35 дақиқалик телефон мулоқотини амалга оширган. Бу уларнинг Канадада ўтган G7 саммитида шахсан учраша олмаганидан кейинги илк мулоқоти бўлди.
Мулоқот пайтида Моди АҚШ воситачилиги ва савдо келишувлари ҳақида ҳеч қандай музокара бўлмаганини очиқ айтган. «Моди Трампга Ҳиндистон ҳеч қачон воситачиликни қабул қилмаган, ҳозир ҳам қилмайди ва келажакда ҳам қабул қилмайди», — деди Мисри.
Трамп эса узоқ вақтдан бери АҚШнинг ушбу келишувда воситачилик қилганини ва савдо фойдаларини музокараларда фойдаланганини айтмоқда. Бу фикрни Покистон ҳам қўллаб-қувватламоқда — Исломобод АҚШнинг уринишларини юқори баҳолаган ва воситачиликка очиқ эканини билдирган.
Мазкур можаро 22 апрел куни Кашмирдаги ҳинд назоратидаги ҳудуддаги ҳужумдан кейин бошланган. Ҳиндистон буни террорчилик акти деб баҳолаган ва айбни Покистонга юклаган. Покистон эса бу айбловларни рад этган.
Трамп чоршанба куни Покистон армияси бош қўмондони Асим Мунир билан Оқ уйда учрашиши кутилмоқда. Шунингдек, у Модини ҳам АҚШга таклиф этган, аммо бош вазир олдиндан белгиланган ташрифлари сабаб ташрифни рад этган.
Шу билан бирга, Мисрига кўра, Трамп Модининг йил охирига мўлжалланган Quad саммитида Ҳиндистонга ташриф буюриш таклифини қабул қилган.