Air India авиакомпаниясига тегишли Boeing 787 Dreamliner самолёти ҳалокатга учраб, камида 279 кишининг ҳаётига зомин бўлган эди. Самолёт Аҳмадобод шаҳридан кўтарилиб, Буюк Британиянинг Гатвик аэропортига йўл олган ва тиббиёт коллежи ётоқхонаси яқинида ерга қулаган.
Ҳиндистон авиаҳалокатларни тергов қилиш бюроси Буюк Британия, АҚШ ва самолёт ишлаб чиқарувчи Boeing компанияси билан ҳамкорликда ҳалокат сабабларини ўрганмоқда. Авиация мутахассиси Амит Сингҳнинг айтишича, учувчилар кабинасидаги овоз ёзувлари ва парвоз маълумотлари ҳал қилувчи далил бўлади. Шу билан бирга, видеокузатув кадрлари, гувоҳлар баёнотлари ва учувчиларнинг тайёргарлик материаллари ҳам текширилмоқда.
Амит Сингҳ махсус урғу берган жиҳат — самолётнинг ортиқча юки бўлиб, бу двигателлар ишига салбий таъсир кўрсатган бўлиши мумкин. Авиация вазири Рам Моҳан Найду Кинжарапу эса икки двигателнинг бир вақтда ишдан чиқишига шамолнинг кескин ўзгариши ёки қушлар билан тўқнашув сабаб бўлганини истисно этмади.
Ҳиндистон ҳукумати тергов учун алоҳида комиссия тузди. Айни пайтда Air India паркидаги барча 33 та Dreamliner самолёти техник кўрикдан ўтказилаётгани маълум қилинди. Бу ҳодиса Boeing-787 тарихида содир бўлган илк ҳалокат сифатида қайд этилмоқда.