19 июн куни Лондондаги ICE Futures биржасида Brent нефтининг август ойи учун фючерслари 3,05 фоизга қимматлашди ва 1 баррель учун 79,04 доллар даражасига етди. Бу кўрсаткич охирги марта 23 январ куни қайд этилган эди. Кечга томон кўрсаткич бироз пасайиб, 78,16 долларга тушди. Умуман, Brent нефти нархи жорий ой бошидан бери 25 фоизга яқин ўсган.
Нархлар ўсишига асосий омил сифатида Исроил ва Эрон ўртасида 13 июндан бошлаб авж олган ҳарбий тўқнашув кўрсатилмоқда. Исроил бош вазири Бинямин Нетаняҳу ушбу урушнинг мақсади Эроннинг ядровий инфратузилмаси, баллистик ракета ишлаб чиқариш объектлари ва ҳарбий салоҳиятини йўқ қилиш эканини маълум қилган. Эрон эса Исроилга қарши ракеталар ва дронлар билан жавоб зарбалари берди.
Goldman Sachs таҳлилчилари геосиёсий хавфнинг Brent нефти нархига 10 долларлик таъсири мутлақо асосли эканини таъкидламоқда. Улар ҳатто нарх 90 доллардан ҳам ошиб кетиши мумкинлигини истисно қилмаяпти. Бу фақат Эрон экспорти камайгани эмас, балки Ҳўрмуз бўғозидаги эҳтимолий узилишлар билан боғлиқ.
Price Futures Group компанияси катта таҳлилчиси Фил Флинннинг таъкидлашича, агарда вазият енгиллашса ҳам, Brent нархи яқиндаги 60 долларлик даражага қайтиб тушиши қийин. У бозор ҳануз геосиёсий хавфларни тўлиқ инобатга олмаганини таъкидламоқда.
Маълумотларга кўра, Эрон OPEC аъзолари орасида учинчи йирик ишлаб чиқарувчи ҳисобланади ва кунига тахминан 3,3 млн баррел нефть қазиб олади. Унинг жанубий соҳилидаги Ҳўрмуз бўғози орқали кунига 18–21 млн баррел нефт ва нефт маҳсулотлари ўтади. Уруш оқибатида ушбу йўналишнинг ёпилиши бутун жаҳон энергетика бозорида кескин ўзгаришларга олиб келиши мумкин.