“The Financial Times” нашрининг хабар беришича, бу йилги Петербург халқаро иқтисодий форумида Россия Президенти Владимир Путин халқаро сармоядорларни ишонтиришга муваффақ бўлмади. Ғарб компаниялари Россия билан ишлаш хавфини инобатга олиб, форумда иштирок этмаган.
Форумга Россиянинг яқин иттифоқчилари ҳам аввалгидек йирик делегациялар эмас, балки кам сонли расмийлар билан келган. Бундан мустасно ҳолат — Индонезия. Бу давлат форумда президент даражасида — Прабово Субианто раҳбарлигида қатнашди.
“Carnegie” фондининг Берлиндеги Россия ва Евроосиё бўйича маркази тадқиқотчиси Александра Прокопенко таъкидлашича, ҳозирги шароитда Россияга сармоя киритиш реал вариант эмас. Уруш, санкциялар, инфляция ва иқтисодий ўсишнинг секинлашуви сармоядорларни чўчитмоқда.
Россия Молия вазирлигининг маълумотларига кўра, ҳар ой ўнлаб хорижий компаниялар Россия бозорини тарк этиш учун расман мурожаат қилмоқда. Молия вазири ўринбосари Иван Чебесковнинг сўзларига қараганда, бундай ҳолат Ғарб санкциялари сақланаётгани ва Путин тинчлик музокараларига тайёр эмаслигини англатади.
“The Financial Times” таҳлилига кўра, бу каби вазиятда Россияга нисбатан жорий этилган санкциялар яқин фурсатларда бекор қилиниши эҳтимоли жуда паст.