Британия ҳарбий-денгиз кучларига тегишли HMS Spey кемасининг жорий ҳафтада Тайван бўғозидан ўтиши Хитой томонидан қаттиқ танқид қилинди. Пекин бу ҳаракатни «тинчлик ва барқарорликка таҳдид солувчи қасддан провокация» деб атади.
Британия Қироллик денгиз кучлари эса ушбу патрул олдиндан режалаштирилган ва халқаро ҳуқуқка тўла мос ҳолда амалга оширилганини маълум қилди. Тайван Ташқи ишлар вазирлиги бундай ҳаракатларни денгизда эркин ҳаракатланиш ҳуқуқини таъминловчи муҳим қадам сифатида олқишлади.
HMS Spey — Ҳинд-Тинч океани минтақасида доимий навбатчилик қиладиган икки британ кемасидан бири ҳисобланади. Бу патрул сўнгги тўрт йилда Британия ҳарбий кемаси томонидан бўғоздан амалга оширилган биринчи юриш бўлди.
Тайванда мустақиллик тарафдори бўлган Президент Лай Чин-тэ ҳокимиятга келганидан сўнг Хитой ва Тайван ўртасидаги танглик кучайди. У Пекинни «хорижий душман куч» деб атаб, Хитой таъсирини чекловчи сиёсат юритмоқда.
Британия Бош вазири Кеир Стармер ушбу ҳарбий юришни мамлакатнинг сўнгги ўн йилликдаги энг йирик ташаббусларидан бири деб атади. HMS Prince of Wales авиаташувчиси етакчилигидаги ҳарбий гуруҳда 4 мингга яқин ҳарбий иштирок этади ва улар 30 давлат билан ҳамкорлик қилади.
Шу билан бирга, Хитой Японияга яқин сувларда бир вақтнинг ўзида иккита авиаташувчи иштирокида машқлар ўтказмоқда. Бу эса Токио томонидан жиддий хавотир билан кузатилмоқда.