Исроил Мудофаа кучлари (ЦАҲАЛ) Эроннинг Ислом инқилоби муҳофизлари корпуси (ИИМК) таркибидаги «190-отряд» раҳбари Беҳном Шаҳриёрий 21 июн куни тонгда ҳаво зарбаси натижасида нобуд бўлганини эълон қилди. Исроил томонига кўра, Шаҳриёрий Эрон ғарбида шахсий автомобилида ҳаракатланаётган пайтда ҳарбий ҳаво кучлари зарбасига учраган.
ЦАҲАЛнинг таъкидлашича, Шаҳриёрий минтақадаги Эронга содиқ қуролли гуруҳлар — жумладан, ҲАМАС, «Ҳизбуллоҳ» ва Ямандаги ҳусийчиларга қурол етказиб бериш операцияларини бошқарган. Унинг Туркия ва Ливандаги алоқалари орқали молиялаштириш ва қуроллантириш жараёнларида иштирок этгани айтилмоқда.
Бу шахснинг ўлими Исроилга душман бўлган кучларнинг қайта ташкил топиши ва жанговар қобилиятини тиклаш жараёнига жиддий таъсир кўрсатиши тахмин қилинмоқда. ЦАҲАЛга кўра, Шаҳриёрийнинг фаолияти минтақада террорчилик ҳаракатларини қўллаб-қувватлашда муҳим аҳамиятга эга бўлган.
ЦАҲАЛ бу зарбани Исроил хавфсизлиги учун стратегик зарурат сифатида баҳоламоқда. Шаҳриярийнинг ўлими нафақат Эроннинг ҳарбий структурасидаги йўқотиш, балки минтақавий қуролли гуруҳлар учун ҳам зарба сифатида кўрилмоқда.
Ҳозирча Эрон томони бу ҳодиса юзасидан расмий изоҳ бермади.