CNN телеканалининг маълум қилишича, АҚШ президенти Доналд Трамп Эрон ядровий инфратузилмасига зарбаларни амалга ошириш қарорини бир неча ҳафта давомида пухта ва махфий равишда тайёрлаган. Унинг маъмурияти бу режани кенг жамоатчиликдан яширишга катта эътибор қаратган.
Масалан, Трампнинг «қарор қабул қилиш учун икки ҳафта керак», деган баёноти аслида чалғитиш тактикасидан бошқа нарса бўлмаган. АҚШ расмийларининг таъкидлашича, у сўнгги қарорни шанба куни қабул қилган бўлса-да, зарбалар бўйича жиддий муҳокамалар июн бошидаёқ бошланган.
Бу муҳокамаларга CIA (МРБ) раҳбари Жон Рэтклиффнинг маълумотлари туртки бўлган. Унинг айтишича, Исроил ҳар қандай вақтда Эронга ҳужум бошлаши мумкин, деган баҳо АҚШни ўз иштирокига тайёргарлик кўришга мажбур қилган.
CNN хабарига кўра, Трампнинг миллий хавфсизлик бўйича маслаҳатчилари бир неча ой аввалдан турли зарба сценарийларини ишлаб чиқишган ва у шундан бирини танлаган. У бир ҳафта давомида ҳар куни миллий хавфсизлик бўйича брифинглар ўтказган.
Трампнинг икки асосий хавотири бор эди: биринчиси — зарбалар Фўрду каби мустаҳкам ерости иншоотларини ҳақиқатан ҳам йўқ қилиши керак; иккинчиси — АҚШни яна бир узоқ ва ҳалокатли урушга тортиб кетмаслиги лозим.
Бу борада америкалик ҳарбийлар ишонч билан сўзлаган. Қўшма штаблар раиси генерал Дэн Кейннинг таъкидлашича, дастлабки баҳоларга кўра, Фўрду, Натанз ва Исфаҳондаги объектларга берилган зарбалар «жуда жиддий шикаст етказган ва ҳалокатли оқибатларга олиб келган».
Таҳлилчиларга кўра, Трамп бу қарор орқали сиёсий кучини намойиш этиш, Эрон ядровий дастурини ҳал қилувчи зарба билан тўхтатиш ва шу билан бирга халқаро жамоатчиликка кучли сигнал юборишни мақсад қилган.